Death march

Dili pasakyon ni Mayor Tomas Osmeña sa Kaohsiung Buses ang mga piniriso sa Bagong Buhay Rehabilitation Center inig pamalhin na niini ngadto sa bag-ong prisohan sa Kalunasan. Matud pa sa Mayor, iyang palakton ang mga piniriso kun mamalhin na sila didto sa Kalunasan, kini human maglagot ang Mayor sa reklamo nga iyang nadawat nga gipaagi sa usa ka text message nga mipasangil kang jail superintendent Efren Nemeño nga nakadawat og tag 40 mil ka pesos sa duha ka mga piniriso agi og suborno aron dili sila mapadala didto sa National Bilibid Prison. Unsa man ka Mayor Tomas Osmeña Hapon? Ipanundog na nimong mga piniriso sa BBRC sa mga prisoners of war sa mga panahon diin naghari pa ang mga Hapon dinhi sa nasud?

Unsa kahay porma sa mga piniriso no inig balhin na nila paingon didto sa Kalunasan nga maglakaw? Hiktan kaha sa taga Bureau of Jail Management and Penology (BJMP) ang mga kamot ug mga tiil sa mga piniriso nga magsumpay-sumpay aron dili kini makapuga?

Kining maong bahad binugo ug magbutang sa mga Sugbuanon ngadto sa piligro. Unsa may mahitabo kun ang duha ka libo kapin ka mga piniriso maglinya nga maglakaw paingon ngadto sa Kalunasan? Dili kaha sila makahuna-huna sa pagpuga o ba kaha luwason sa ilang mga kauban aron makapuga? Ug kun mahitabo kini, dili kaha magkaengkwentro ang mga jail personnel ug ang mga piniriso ug sa mga mosuway sa pagluwas kanila ?

Tungod ba lang kay adunay reklamo batok ni jail superintendent Efren Nemeño mao dayon kini ang imong himuon Mayor Tom? Wa pa gani ka masayod kung tinuod ba ang maong pasangil? Ibutang ta nga tinuod ang maong pasangil, isakripisyo ba nimo Mayor Tomas Osmeña ang seguridad sa mga Sugbuanon tungod lamang sa kasal-anan ni Nemeño?

Nganong dili man nimo ipagamit ang mga kaohsiung buses ngadto sa taga BJMP aron pasakyan sa mga piniriso paingon ngadto sa Kalunasan? Para asa naman lang diay ang mga kaohsiung buses? Para na lang ba diay kini sa mga boang nga inyong gipangkarga dala ngadto sa bukid aron dili kini makit-an sa mga bisita tang turista ug mga lider sa ASEAN ? Para na lang ba sa mga patay ang mga kaohsiung buses? O para na lamang kini sa mga mangaligo og dagat?

* * *

Wa gyod mahuman ang Cebu International Convention Center kon CICC. Kun wa pay mga kondisyon si kanhi Senador Sonny Osmeña sa pagdawat sa 1.5 milyones ka pesos nga kasado ni Architect Manuel Guanzon, pordoy na unta ron og 1.5 milyones ka pesos si Architect Guanzon. Hinuon di nato mabasol si Architect Guanzon mahitungod sa pakyas niyang pagbana-bana, kana tungod kay pagbana-bana man lang tong iyang gihimo.