SUGILANDONG/ Gihikay Ni REV. FR. REYNALDO T. CUI

Si Alibaba

Samtang si Alibaba namunit og mga layang kahoy aron isugnod, nakaalinggat siya nga dunay hugpong sa mga bandido nga nagpadulong sa iyang nahimutangan. Tinukmod sa dakong kahadlok, nitago siya luyo sa dakong bato. Sa dihang naabot na ang mga bandido, iyang nadunggan ang dako niini nga nisinggit sa mga pulong ug naabli ang ganghaan sa usa ka langob diin didto nahimutang ang mga bahanding kinawat. Sa dayong lakaw sa maong mga bandido gisirad-an ang ganghaan ginamit ang mao lang gihapong mga pulong. Sa dihang wala na ang hugpong sa mga bandido, si Alibaba, maoy niabli sa maong ganghaan ginamit ang maong mga pulong. Sa sulod, iyang nakit-an ang mga tinumping mga bahandi nga mga kinawat. Sa matag karon ug unya, kini pagabalikon gyud ni Alibaba aron siya mismo mangawat. Wala madugay, siya nadato ug nahimong hamugaway ang iyang pagpuyo...

PAMALANDONG

Kadaghanan sa katawhan ang buot maharuhay ang pagpuyo ug malingkawas sa tumang kalisud. Apan sa dakong tinguha nga mahamugaway ang pagpuyo, daghan usab ang nahitumpawak sa mga pagkinabuhing dili tinarong sa pamasin nga mabatonan diha-diha ang hinanaling kadato...