Si Ortiz, Delfin ug ang Isla sa Camotes

Si Senior Inspector Ramon Ortiz Jr, hepe sa kapulisan sa lungsod sa San Fernando gipasanginlan nga mag-brief sulod sa police station diin siya gidistino sa panahon nga kini mahubog. Gipasanginlan usab siya nga migamit personal sa sakyanan sa kapulisan sa San Fernando sa panahon nga kini mangompra ug motambong sa tigbakayay. Lain pang pasangil batok kaniya mao nga wa kini mohatag og resibo niadtong mikuha og police clearance alang sa pagpanarbaho. Si Ortiz una na usab nga gireklamo tungod sa matud pa pagpanguha og mangga nga dili iyaha ug pagpamaak sa dunggan sa usa ka tawo nga iyang gikabagat gumikan sa trapiko.

Sa wa pa pasanginli si Sr. Insp Ortiz, una na usab nga gipasanginlan ang iyang sakop nga si SPO1 Benjamin Delfin tungod sa pagpangilkil niini ngadto sa usa ka Filipino-Amerikan og tres mil ka pesos. Tungod sa maong kaso gibalhin si Delfin didto sa Isla sa Camotes.

Karon mao na usay ibalhin didto sa Camotes si Senior Inspector Ramon Ortiz gumikan sa iyang pagpabadlong didto sa lungsod sa San Fernando diin siya maoy hepe.

Ang akong pangutana ngadto sa director sa kapulisan sa probinsiya sa Sugbo Senior Superintendent Vicente Loot, unsa may sala sa mga taga Camotes nga labayan man nimo og police nga badlungon? Gilabay na nimo sa nahisgutang isla si SPO1 Benjamin Delfin ang police nga gipasanginlan nga nangilkil unya imo na usab nga isunod sa pagbutang didto si Ortiz? Sa imong pagbutang ni Ortiz ngadto sa Camotes nagtoo ka nga magtinarong na ang nahisgutang police?

Angayan nga masayran nimo Sr. Supt. Vicente Loot nga nadiin-diin na lamang malabay kini si Ortiz tungod sa iyang pagkabadlungon pero hangtod karon padayon gihapong nagpabadlong. Moretiro na lamang seguro si Ortiz sa iyang pagka police pero ambot morag maihap lang ang mga higayon nga siya nagtinarong sa iyang pagka police.

Tungod kay daginoton ang gidaghanon sa mga police sa probinsiya mao na nga e-recycle lamang ang mga police nga badlungon? Ang pagdistino sa mga police nga badlungon ngadto sa laing dapit dili kini ang tubag ug sulbad sa ilang pagkabadlungon, ang tubag ug sulbad mao ang pagtangtang gayod nila sa katungdanan kana tungod kay wa kini silay luna sa organisasyon sa kapulisan. Wa magkuwang ang gidaghanon sa mga police. Adunay daghang tarong mga batan-on nga gustong mag-police, nganong dili man nato sila hatagan og kahigayonan nga ma-police aron hulipan nila ang mga badlungon sa nahisgutang organisasyon?

Kutob sa magpabadlong nga police tangtangon dayon sa katungdanan sa wa nay pagpupangutana basta klaro ug tataw kaayo ang nahimo niining kahiwian, mao kini ang akong gituhoan nga makapaminos o ba kaha makapawagtang sa mga police nga badlungon sa moabot nga mga adlaw.

Sa mga taga Camotes, mosugot mo nga butangan og police nga badlungon?