Nangilkil kuno

Maayong imbistigahon gayod sa kapolisan ang pasangil nga tulo ka polis diha sa Punta Princesa police station nangilkil sa ilang dinakpan didto sa barangay Calamba nga matud pa naghupot og drugas.

Ang gipasanginlan nga nangilkil mao sila si PO3 Alejandro Batobalonos, PO1 Leopoldo Bullido ug PO1 Ansgar Bebeboy Reales kinsa pasakaan kini og kaso sa kabanayan sa ilang gidakop.

Ang tulo ka polis maoy midakop ni Mercenario Rollon, 29-anyos, taga sitio Cogon, A. Lopez, barangay Calamba kaniadtong gabii sa Oktubre 31.

Dunay mga saksi, usa kanila mao si Lina Inoc, nga andam motestigos nga si Rollon gidakop sa mga polis mga alas 8 pa sa gabii apan sa police blotter, gibutang nga nadakpan kini ala 1:30 na sa kaadlawon.

Ang puyo-puyo ni Rollon nga si May Cabarse, mipasangil nga midemanda kaniya ang mga polis nga pabayron siya og P35,000 aron dili nila pasakaan og kaso ang iyang bana sa paglapas sa section 5, Article II, sa Republic Act 9165.

Kahilakon si Cabarse nga misaysay nga namukaw tawon siya sa ilang silingan nga si Presentacion Demoral mga hapit na ang tungang gabii aron iprenda ang ilang balay.

Apil si Demoral nga miari sa opisina kagahapon og mimatuod nga wala mamakak si Cabarse ug gani nabayran g'yod niya og P30,000 ang gamay'ng balay sa magtiayon.

Kon kini ang imong tuohan nga si Cabarse miadto sa balay ni Demoral sa wala pay tungang gabii, nganong gibutang man sa kapolisan nga nadakpan nila si Rollon ala 1:30 sa kaadlawon?

Ikaduhang pasangil ni Cabarse mao nga ang iyang bana wala g'yod dayon dad-a didto sa police station human sa iyang pagkasikop.

Matud ni Cabarse nga ang iyang bana didto gidala sa mga nagdakop kaniya sa ikaduhang andana sa barangay hall sa Punta Princesa nga unta ang police station anaa ra man sa ground floor.

Giinsister ni Cabarse, ug sa inahan ni Rollon, nga ang dinakpan wala g'yod malambigit sa pagpamaligya og shabu apan gibutang-butangan ra kini sa mga polis.

Kini maoy rason nga si Cabarse ug ang iyang ugangan mopasaka gayod og kasong administratiba batok sa tulo ka polis adto sa Internal Affairs Service sa Cebu City police office.

Kon mapamatud-an gani nga ang maong mga polis midala sa ilang dinakpan sa laing lugar sa wala pa dad-a sa ilang police station, tataw sila nga masilotan.

Ang National Police Commission dunay lagda nga usa ka illegal kon ang mga polis modala sa ilang dinakpan sa laing lugar human sa ilang pagkasikop.

Ang lagda mao nga ang mga dinakpan dad-on direkta sa police station og i-blotter ang ilang pagkasikop aron mahikay dayon ang kaso batok kanila.

Si Cabarse miingon nga makaila pa siya sa dagway niadtong polis nga midakop sa iyang bana ug ilabi na kadtong midawat sa P30,000 nga iyang gihatag.

Kay P35,000 man unta ang gipangayo sa maong mga polis, napugos si Cabarse nga ihatag paglakip sa mga polis ang iyang cellphone sa pagtoo nga mabuhian ang iyang bana.

Apan kon tinuod man ang pamahayag ni Cabarse, tataw nga wala siya makasabot.

Matud pa nga giingnan siya sa kapolisan nga pabayron siya og P35,000 aron nga section 11 ra ang ipasakang kaso ug dili na pasakaan og paglapas sa section 5.

Ang section 5, Article II sa Republic Act 9165 mao ang pagpamaligya og shabu samtang ang section 11, mao ang paghupot og shabu.

Basi sa blotter, si Rollon nasakmitan lang og usa ka paketeng shabu apan wala kaayo itataw kon giunsa nila pagsikop ang suspetsado.

Gikontak nako ang police station kagahapon, wala didto ang tulo ka polis. Awhagon nako sila nga mokontak nako kay aron matubag ninyo ang pasangil ni Cabarse.