Kalipay mo apan kasakit ko

Dagko kaayo og ngisi ang mga bag-ong nurses nga nakapasar sa Hunyo 11 ug 12 , 2006 nga nursing board examination human ang court of appeals mimando ngadto sa PRC nga papanumpaon na sila sa ilang profession samtang ang nakapanumpa pahatagan na sa ilang mga lisensiya sa pagka nurse. Apan ang mga gimandoan sa pagkuha pagbalik sa pasulit nagmagol-anon.

Samtang ang opposition nagmalipayon gumikan sa pagbasura sa labaw'ng hukmanan sa petition nga gisang-at sa sigaw nang bayan ug ulap alang sa pag-usab sa batakang balaod pinaagi sa peoples initiative, ang administrasyon ug ubang politiko nagmagol-anon ug gikasakit ang maong hukom tungod kay dili na unya sayon nila ang pagpabilin sa ilang gahum.

Samtang ang mga patay nga atoa na karon sa langit ug ang mga patay nga kanunay nga giampo sa ilang mga kabanay aron ang ilang mga kalag nga anaa pa sa porgatoryo mahalangit, nagmalipayon, ang mga patay nga wa na mahinumdumi sa ilang mga kabanay nagminatay seguro tungod sa tumang kasakit kay gibaliwala na lamang sila sa ilang mga minahal sa kinabuhi.

Kining tanan timailhan lamang nga luyo sa mga kalipay anaay nagpahipi nga mga kasakit ug mga kagol-anan. Ang kalipay mo kagol-anan ug kasakit sa uban, mao kini ang hinungdan kon nganong ang uban nagmahay sa katilingban ug kahigayonan. Nganong dili man ang tanan ang gihatagan sa kalipay, nganong gipili man lang ang gihatagan niini? Dili ba diay puyde nga mahatag sa katilingban ang kalipay ngadto sa tanan aron ang tanan magmalipayon? Unsa kahay dagway sa kalibutan kon ang tanan malipayon? Aduna na kahay kalinaw?

Pila na lamang ka adlaw gikan karon Nov. 15 na, ang petsa nga atong gikahinaman diin niining maong petsa matubag na gayod ang pangutana kon mahuman ba ang Cebu international Convention Center diin anha ipahigayon ang mga kalihukan sa umaabot nga Asean summit. Ang ako lang mga panghinaut nga unta matuman ang mga pangagpas ni Architect Manuel Guanzon aron hingpit nga magmalampuson ang atong paghost sa 12th Asean Summit nga anhi gayod ipahigayon sa atong nataran.

Ang maong kalihukan garbo kini natong mga sugboanon busa angayan lamang nato kining suportahan. Lain usab nakong panghinaut nga unta dili lamang ang natad sa kalinaw ug negosyo ang hisgutan sa mga dagkong lider sa Southeast Asia, ipunting usab unta nila ang ilang tigum sa problema sa ginadili nga drugas.