EDITORYAL — Kampanya nasad vs. overnight parking

Ang Land Transportation Franchising and Regulatory Board (LTFRB) misubli sa ilang kampanya batok sa mga sakyanan, labi na ang PUJ, nga moparking daplin sa kadalanan sa kagabhion.

Si LTFRB 7 Director Rogelio "Jingjing" Osmeña miawhag sa mga opisyal sa barangay sa pagtabang sa pag-implementar sa ordinansa nga nagdili sa overnight parking sa siyudad.

Gihangyo ni Osmeña ang mga barangay opisyal sa paglista sa plate numbers sa mga PUJ ug ubang sakyanan nga mihimo sa daplin sa karsada nga ilang garahe.

Ang hangyo ni Osmeña sayon ra kaayo nga matuman sa mga barangay opisyal. Pila ra gud paglista sa plaka. Ang kwestiyon mao: Aksiyonan ba dayon sa LTFRB ang lista nga ihatag kanila sa mga barangay opisyal?

Panahon na nga limpiyohan ang daplin sa atong kadalanan sa mga overnight parkers kinsa nakasagabal sa dagan sa trapiko. Bahala na'g kinsay tag-iya sa maong mga sakyanan.