Pustaanay sa CICC

Aron ba kaha maundang na ang mga kabalaka sa pipila mahitungod sa pagkahuman sa pagtukod sa Cebu International Convention Center sa tukmang panahon, si Architect Manuel Guanzon nakigkasado og tunga sa milyon agi og pagpaniguro nga mahuman gayod ang maong edipisyo diin anha ipahigayon ang mga kalihokan sa umaabot nga ASEAN Summit karong Disyembre. Apan bisan pa man sa report ni Architect Guanzon nga 96 porsiyento na ang pagkahuman sa CICC daghan gihapon ang wa motuo kaniya, hinungdan nga ning bag-o nakigkasado na gayod siya og 1.5 milyon ka pesos.

Tungod sa kadako na sa itaya ni Architect Guanzon makaingon ta nga seguro na gayod siya nga mahuman ang CICC ug iya kini nga matugyan ngadto sa kagamhanang provincial sa panahon nga iyang gisaad.

Kamo diha ayaw nalang mo pakiglalis sa mga experto kay mas labaw silang nasayod kay kaninyo kon mahuman ba ang CICC o dili ba. Bisan man tuod og nasayod kita nga way modawat sa taya ni Architect Guanzon tungod sa kadako niini, sayod pod kita nga di siya motaya sa maong kantidad kon dili siya seguro nga mahuman ang CICC sa tukmang panahon. Gawas lang seguro kon dawaton sa hilom sa WT Construction ang taya ni Guanzon kay dinhi segurado gyod nga di mahuman ang CICC ug segurado na usab nga pilde si Guanzon sa iyang taya nga 1.5 milyones ka pesos kay ang WT Construction ugod ang nagtukod sa CICC, unsay kalibutan nato kon sabutahion siya aron lang mapilde ang iyang taya o posta.

Sa laing bahin ang paghagad ni Guanzon ngadto sa iyang mga kritiko og pustaanay kon mahuman ba ang CICC o dili nagpakita lamang kini kon unsa ka sugarol ang pinoy kay bisan ang pagpatukod sa usa ka edipisyo pustaan pa.