Pulos consuelo de bobo

Usa ka kadaugan alang sa banay'ng dela Victoria ang pagkakonbikto ni SPO1 Marcial Ocampo sa miaging adlaw.

Apan ang maong kadaugan dili magamit aron makita nila pagbalik si Jojo dela Victoria nga gibirahan ni SPO1 Ocampo atubangan sa balay niini sa Talisay.

Conseulo de bobo ra gyud nga hustisya ang naangkon sa gibilin nga banay ni Jojo nunot sa desisyon sa korte nga bilanggoon si SPO1 Ocampo og 20 ngadto sa 40 ka tuig.

Suluguon lamang si SPO1 Ocampo.

Apan takulahaw lang ang pagkahanaw sa anggulo nga "sindikato" ang nagpatumba kang Jojo tungod sa pagkaaktibo niini sa kampanya batok ilegal nga pagpanagat.

Dayag na usab sa publiko nga dili mahimo ni SPO1 Ocampo ang pagpatay kang Jojo kun wala pay nagsugo kaniya.

Walay personal nga motibo si SPO1 Ocampo nganong patyon niya sa Jojo.

Pareho silang mga tinugyanan sa balaod.

Busa, nganong hangtod karon wala pa man gyuy nadakpang mastermind sa pagpatay kang Jojo?

* * *

MASTERMIND. Mao usab ang akong kalibog nganong hangtod karon wala gyuy nadakpan ug nataral sa hukmanan nga mastermind sa pagpatay sa mga kaubanan namo sa media nga gipamatay tungod sa ilang pag-expose sa mga kabuang sa pipila ka mga tawo.

Ang kaso ni Jojo nakapahinumdum kanako sa pooled editorial niadtong Lunes, usa ka adlaw human gibuksan ang ika-12 nga Press Freedom Week 2006. Sa maong editorial, gipahinumdum nato ang daghang kaso sa mga pagpangamatay sa mga sakop sa media nga hangtod karon walay nangadakpan nga mastermind. Makapanghambog man ang gobyerno nga wala sila magmakulang pag-imbestigar sa maong mga kasong pagpatay sa mga sakop sa media. Apan utro silang mga kunsabo sa mga sindikato nga kontra sa media tungod sa ilang pagtuyo og tagotago sa mga tinuod nga nagpaluyo sa mga krimen nga naglambigit sa mga sakop sa media nga mga biktima.

Kumustaha kuno ninyo ang kaso ni Allan Dizon, ayaw na lang kadtong mga nanghitabo sa Mindanao kay layo na kaayo to. Sumala ba, duna ba guy nangailhan nga mastermind?

Duna ba guy kongresista o mayor nga gi-prosecute tungod sa pagsugo o pagpaluyo sa pagpatay sa sakop sa prensa?

Consuelo de bobo ra gyud nang pagdakop sa mga mamumuno sama sa pagdakop ug pagkonbikto ni Dodong Inso Belandres nga maoy mipatay ni Allan, apan ang nagsugo niyang sindikato sa drugas diha sa Lorega, wala gyud matandog.

Dili makamahay ang kagamhanang nasyonal kun maanggaan ang nasud nga Pilipinas nga usa sa mga labing kuyaw nga nasud sa Asya kun hisgutan ang seguridad sa media.

Dayag pa ang pagpamatay nga walay kukaluoy'ng himuon sa mga mamumuno.

Dayag pa kaayo ang walay klarong direksiyon sa imbestigasyon sa kapolisan.

Ug dayag kaayong hilaw nga hustisya ang nahatag sa kagamhanan ngadto sa gipamilin nga kabanay tungod sa pag-coverup sa tinuod nga utok sa krimen.

* * *

UTANG. Laing kasong angayang sundan sa publiko ang pagpatay sa tigpatanto nga si Pilar Hernandez.

Alang sa wala makasunod sa balita, polis ang gisuspetsahan nga mipatay kang Mam Pilar tungod sa mga sirkumstansiya nga usa niini mao ang kamatuoran nga ang gipatay maoy tigpatanto og kuwarta sa mga opisyal ug sakop sa kapolisan.

Busa, dili na lang ko mahibulong nganong hangtod karon wala gyuy nailhan ug nadakpan nga polis nga gilambigit sa kasong pagpatay ni Mam Pilar.

Dili ko motuo nga naglisud ang kapolisan pag-ila sa mamumuno ni Mam Pilar.

Duna na silay clue: polis ang nagpatay kang Mam Pilar.

Unsa pa man ang ilang gikinahanglan? Ang kapolisan adunay roster kun listahan sa ilang mga sakop.

Dili sila maglisud sa pag-ila sa mga sindikatong kriminal nga sa una wala silay rekord, unya maglisud sila pag-ila sa polis nga ila ra nga kauban sa trabaho?

Ah! Makaduda na pud na.

Consuelo de bobo ra gyud diay kadtong gipatuman nga "police line up" sa mga sakop sa kapolisan nga may apilyedo o ngalan nga kaparehas paminawon sa gilitok ni Mam Pilar sa wala pa kini mabugtoi sa ginhawa.

Adunay mga estorya nga atong nadunggan nga gipaninguha sa kapolisan nga mahilot lang ang kaso o mahilom sa hangtod tungod kay dakong uwaw sa tibuok puwersa sa kapolisan kun madakpan ang mamumuno ni Mam Pilar unya mogawas nga gipatay kini sa polis tungod sa utang.

"Tigpatanto gipatay sa polis nga dili makabayad sa utang" - dili ba makauulaw nga estorya?