Kusog mo-overtake

Dili ikalimod nga daghan kaayong mga driver og public utility vehicle dinhi sa Pilipinas nga mga abusado ug "reckless" kaayo diha sa ilang pagmaneho. Gani, usa nako ka higalang Insek nakaingon nga "crazy" ang mga Pilipino kon magmaneho og sakyanan tungod kay naobserbahan niya sa iyang pagbisita dinhi sa Pilipinas ang paturagas nga pagmaneho sa atong mga sapyor.

Dugtong niini, nakadawat kog text nga nagkanayon: "Maayong adlaw. Duna koy reklamo bahin niining mga mini-bus nga magbiyahean og Carcar gikan siyudad. Kusog kaayong mo-overtake unya mokawat og lane. Kadaghan na ko makasugat og minibus nga magbiyahean og Carcar nga morag gigukod og multo. Kon magpadagan morag nakiglumba. Hinaot nga hatagan kini og pagtagad sa atong kagamhanan. Salamat." -- 277-63918-3140193 (August 21, 2006 --07:04:19)

Manghinaot kita nga pinaagi niining lindog, makaabot ngadto sa kasayoran sa nahingtungdang ahensiya sa atong kagamhanan kining maong impormasyon aron ilang ma-monitor kanang mga driver og mini-bus nga kusog ra kaayong mopadagan sa gimaneho nilang sakyanan. Adunay speed limit nga angay nilang tamdan. Ug kinahanglang dili sila magpataka lang og overtake tungod kay kuyaw kini sa disgrasya.

Usa sa hinungdan sa disgrasya sa mga sakyanan mao kanang lumba-lumba tungod usab sa pag-ilogay sa mga pasahero. Kon dili makabangga og tawo nga maglakaw, ang sakyanan gyod mismong gimaneho maoy madisgrasya. Ug luoy gyod intawon kaayo ang mga pasahero nga luwan sa sakyanan nga maamong sa ilang kabuang.

Angay hunahunaon sa mga driver nga sa ilang pagmaneho sa sakyanan nga de pasahero, anaa sa ilang mga kamot ang mga kinabuhi sa ilang mga pasahero. Mao nga angay gayod silang mag-amping sa ilang pagmaneho kay kon madisgrasya ang sakyanan nga ilang gimaneho, dili lang ang ilang kinabuhi maoy nameligro kondili lakip na usab ang kinabuhi sa mga pasahero.

Pero kon gahi gyod silag ulo ug dili mopatuo, angay silang disiplinahon. Niini, dakog papel ang mga ahensiya sa atong kagamhanan nga may katungod sa pagpanghilabot ug pagpitol sa abusadong mga driver.

(Sumbong ug reklamo? Text sa 0910-8105522)