Cerge ang bag-ong anti-poverty czar

Laing kalampusan ang naangkon karon sa mga Sugboanon nunot sa pagkatudlo ni Government Mass Media Group Secretary Cerge Remonde isip bag-ong lead convenor sa National Anti-Poverty Commission (NAPC).

Nanumpa sa bag-ong katungdanan si Remonde atubangan ni Pres. Gloria Arroyo niadtong Biyernes, uban ni kanhi Philippine National Police chief Arturo Lomibao nga nanumpa usab isip bag-ong kalihim sa National Irrigation Administration, didto sa Malacañang.

Ang pagka-bag-ong hepe ni Remonde sa NAPC, nadugang lamang (concurrent capacity) sa iyang pagka-kalihim sa GMMG nga naggunit sa ranggo nga cabinet secretary.

Isip bag-ong lead convenor sa NAPC hulip kang Datu Zamzamin Ampatuan, si Remonde ang gitahasan sa Malacañang sa pagpakig-alayon sa mga ahensiya sa kagamhanan nga maoy natahasang mopadagan sa kampanya sa kagamhanang nasyonal batok sa kalisud.

Ang mga ahensiya sama sa Department of Social Welfare and Development, Department of Health ug Department of Agrarian Reform adto mokunsulta ni Remonde sa mga programa niini nga nakalinya sa programa ni Arroyo batok sa kalisud (anti-poverty program).

Usa ka dakong hagit ni Remonde ang paghupot sa susamang ahensiya sa kagamhanan.

Apan nasayod ang mga Sugboanon nga dili layo alang kang Remonde ang kalisud tungod sa iyang kaagi gikan sa pagka-bata hangtod nagtubo nga gikaluhaan sa kalisud. Ang kinabuhi ni Remonde dili iglayo sa naagiang kalisud ni kanhi Supreme Court Chief Justice Hilario Davide Jr. sa bukid nga iya ra usab nga katagilungsod sa Argao.

Nakahibalo si Remonde unsay pobre. Unsay kalisud. Unsay tawong naglisud. Unsay kahimtang sa pamilyang nagkalisud.

Busa, mas kasaligan ang iyang pamaagi pagpatuman sa kampanya sa kagamhanan batok sa kalisud tungod kay "hands-on" na siya niining klaseha sa kinabuhi sukad kaniadto sa iyang pagka-batan-on hangtod nga nahimo siyang general manager sa usa ka estasyonan sa radyo; isip brodkaster, nasugatan na niya pirme kaniadto ang kapait sa pagka-tindera og utanon, pagkamamumuo nga gisuweldohan og hilabihang kagamay, ug pagka-drayber nga kanunay nang naalkanse tungod sa sunodsunod nga pagsaka sa presyo sa lana.

* * *

UTANG. Angayang palawman sa mga awtoridad ang imbestigasyon sa kasong pagpatay kang Mam Pilar Hernandez, tag-iya sa PRH Lending Investor sa Tejero, nga gipatay uban sa iyang sekretarya diha sa iyang opisina niadtong Sabado.

Mismo ang mga polis nga nasayod sa nahidangatan ni Mam Pilar tibuok og pagtuo nga polis ra usab mitira o nagpatipi kaniya.

Ang lending firm nga gidumala ni anhing Mam Pilar maoy suki sa mga polis nga huwamanan nila og kuwarta.

Nabatasan na usab ni Mam Pilar, sumala sa iyang mga staff, nga dili magpasulod ni bisan kinsa diha sa iyang opisina gawas kun polis ang mosulod.

Ang pamilyang Hernandez nasuod na gani sa mga ordinaryong polis ug mga opisyal tungod sa klase sa negosyo ni Mam Pilar.

Busa dili layo ang posibilidad nga adunay kalambigitan ang kamatayon ni Mam Pilar sa iyang pagpahulam og salapi ngadto sa mga polis.

Adunay milutaw nga mga pagduda nga dili yano o ordinaryong polis ang mitumba o mipatumba kang Mam Pilar.

Sumala pa nga ang mga yanong polis limitado og kantidad nga mahulam sa lending firm ni Mam Pilar. Apan adunay mga estorya nga nanggawas nga adunay pipila ka opisyal sa kapolisan nga adunay dakong utang diha sa PRH Lending Investor nga gipangunayan og dumala ni Mam Pilar.

Kun adunay posibilidad ang kalambigitan sa pagpautang ngadto sa mga yano o opisyal sa kapolisan ang kamatayon ni Mam Pilar, kasaligan pa kaha ang imbestigasyon nga ilusad sa kapolisan sa dakbayan?

Dili man tingale malubog ang imbestigasyon tungod sa ka-impluwensiyado usab sa pamilyang Hernandez diha sa kapolisan, apan dili layo ang posibilidad nga may mga tawong matabunan aron dili malambigit sa linuog nga pagpatay ni Mam Pilar.

Dili man ko miyembro sa pamilyang Hernandez, apan kun akoy pabut-on maayong itagana ngadto sa laing law enforcement agency ang pag-imbestigar sa kamatayon ni Mam Pilar. Aduna man kitay National Bureau of Investigation nga makahupot sa imbestigasyon.

Kay nagtuo ko nga kun anha ipabilin sa kapolisan ang paghupot sa imbestigasyon, gikuyawan ang kadaghanan nga basin unya og pug-okon ang resulta aron pagprotehir sa tinoray nga mastermind sa linuod nga pagpatay ni Mam Pilar.

Si Mam Pilar inahan sa among kauban sa among grupo sa airsoft game.