Hain na ang paraffin test?

Akoy naluoy karon sa sitwasyon ni Kongresista Nerissa Soon-Ruiz tungod niining panag-away ni Mayor Thadeo Ouano ug sa negosyanteng si Norberto Quisumbing Jr.

Karon nga wala na siyay Sonny Osmeña nga kasandigan, nahasirisiri siya asa mopasabak -- sa mga Ouano o sa mga Quisumbing -- alang sa 2007 nga eleksiyon, hangtod nakapatumaw sa kabalaka nga gihimo ra diay siyang "lawog sa tirong."

Nakatilaw na baya og tagam si Inday Neri sa dihang midagan siya pagka-mayor niadtong unang pagdagan ni Tedy sa Mandaue human mapupos ang termino ni Ingko Pedong.

Apan nganong midaog man siya pagka-kongresista pagka-sunod eleksiyon? Siyempre, ang kontra niya utrong nagsalimuang sa politika, si kanhi Kongresista Efren Herrera nga hangtod karon wala pa gyud makasabot unsay dula sa politika.

Naglaraw si Inday Neri nga modagan pagka-mayor sa Mandaue.

Magbangga silang Jonkie nga utrong may gatas pa sa baba kun hisgutan ang politika, apan kanunay'ng gihapuhap sa iyang amahan nga mayor ug apohan nga si Ingko Pedong nga dakong patron sa politika sa probinsiya.

Ang gikuyawan nako kun mapilde siya pagka-mayor ni Jonkie, unya si Tedy modaog pagka-kongresista, maglisud na siya pagbalik sa politika.

Apan hangtod karon wala pa ko makaapas sa tuyo ni Inday Neri pag-abiba sa mga Ouano niadtong Charter Day ug pagpahalipay ni Quisumbing atol sa adlaw'ng natawhan sa negosyante pinaagi sa advertisement sa newspaper.

Samot nang hangtod karon dili nako maapsan unsay anaa sa hunahuna ni Quisumbing alang sa Mandaue ug sa kinatibuk-ang siksto distrito.

Kun tinud-on ni Quisumbing ang pagseryoso sa politikanhong plano diha sa siksto, unsa kahay dangatan sa mga Ouano?

May igo ba nga makinarya ang mga Quisumbing nga ikasakbang sa makinarya nga mibayaw sa mga Ouano sa gahum?

Hinuon, dako pang buhi si Ingko Pedong.

Si Ingko Pedong adunay igo ug dakong katakus pagtagna sa politikanhong ugma sa siksto.

Busa, nasayod siya unsay sangpotan sa iyang mga anak ug mga apo kun buhaton niini ang usa ka butang diha sa politikanhong away, sama sa pagpakigsakbang og Quisumbing.

* * *

JOAVAN. Dugay ra'ng migawas ang resulta sa paraffin test batok ni Joavan Fernandez, adopted nga anak ni Mayor Socrates Fernandez.

Apan hangtod karon, wala gyud ipublikar ang resulta niini.

Padayong gitagotago ni Mayor Soc ang resulta sa paraffin test, timaan sa iyang padayong pagkonsentir sa mga sala nga nahimo sa iyang anak nga angayang dad-on didto sa hukmanan.

Kun padayon nimong ililong sa katawhan kanang resulta sa paraffin test, Mayor Soc, makapatibuok hinuon kana sa pagtuo kanamong nagsunod sa kontrobersiya nga giatubang nimo ug sa imong anak nga "positibo" ang resulta sa paraffin test; nga ang imong anak nakapabuto og armas; nga makapatibuok sa pagka-suspetsado sa imong anak niadtong kamatayon sa usa ka tawo ug pagkaangol sa laing tulo.

Maayo usab dakdakan sa tanang pagsaway si Supt. Romeo Perigo, ang lawgaw'ng hepe sa Talisay, tungod sa kawala niini sinserong disposisyon kabahin sa kaso ni Joavan.

Naglibog lang hinuon ko kinsay tinuod nga adopter ni Joavan: si Mayor Soc o si Perigo kay si Perigo naingon naman usab og si Mayor Soc nga puwerteng paninguha nga malubog ang imbestigasyon aron maluwas sa kasong kriminal si Joavan.

Wala na ko kahibalo kun suhito ba sa iyang trabaho si Perigo isip hepe sa kapolisan sa siyudad kang kansang mayor maoy nangamahan sa tawong ilang gi-imbestigar.

Makasabot usab ko sa sitwasyon ni Perigo kun pit-on siya ni Mayor Soc. Apan angayan niyang barugan ang iyang pagka-hepe.

Nganong dili man makakuha si Perigo sa resulta sa paraffin test ni Joavan nga hepe man kaha siya sa kapolisan sa Talisay?

Kun dili makakuha si Perigo sa resulta sa paraffin test, maayo pa diay'ng mo-undang na lang siya sa pagka-polis kay wala man diay siyay "power" o dili makamaong mo-exercise sa iyang responsibilidad isip opisyal sa kapolisan.

Siyaro, resulta sa paraffin test lang dili ka makamao mokuha?

Duna kitay impormasyon nga nakuha nga wala mag-inusara si Joavan atol sa pagpamusil niini sakay sa usa ka Revo didto sa South Reclamation Area.

Aduna usab kitay impormasyon nga ang resulta sa ballistic test nagpakita nga ang armas nga gigamit ni Joavan sa pagpamusil iya sa usa ka konsehal sa Minglanilla.

Tungod niini, migawas ang impormasyon nga kauban ni Joavan niadtong tungora ang anak sa maong konsehal nga nailhan lang sa ngalang Jovannie.

Unya, nganong wala man kini mogawas sa imbestigasyon, Supt. Perigo?

Aduna ka pay higayon nga mopamatuod nga wala ka gawngi diha sa Talisay, Supt. Perigo.

Buhata ang imong trabaho!