Brand new car

Usa sa bantayanan karong panahona mao kining cellphone number 0906-6820268. Ang tag-iya niining maong numero usa sa responsable sa pagkatap sa text scam nga gusto lang mangilad sa atong kaigsuonan.

Matud pa sa atong texter nga tag-iya sa cellphone number 0906-9957241, ang tag-iya sa cellphone number 0906-6820268 nagpadala kaniyag congratulatory message. Nagpaila kini kaniya nga taga TV network ug nagdala sa ngalan nga HLJR (inisyal). Ang text niining maong tawo nagpahibalo ngadto sa atong texter nga nakadaog siya og brand new car sa pag-raffle sa ilang TV station.

Sumala sa asoy sa atong texter, gipapalit siyag unom ka buok Smart Buddy cell cards ug napulo ka Globe cell cards ni HLJR. Kini (kuno) ang proseso ug rekisitos aron ma-claim niya ang nadaog niyang brand new car.

"Unsa man kini ka tinuod?" Pangutana sa atong texter.

Ang akong tubag mao nga ayaw gayod pagtuo niana kay dako kanang ilad. Ang imong nadawat usa ka matang sa text scam nga nagpadayon pa gihapon hangtod karon.

* * *

Sa laing bahin: "Ang akong reklamo mao ang kahugaw ug kabaho sa sulod sa Calamba Cemetery ug nganong daghang squatter nga namuyo sulod sa sementeryo. Nganong dili man makontrol sa nagdumala kining mga tawhana? Hain man diay ang kita niining menteryoha? Mao kini ang akong reklamo ug pangutana ngadto sa nagdumala niini. Mahimo ba nga pasabton mi? Thanks." -- 0906-2545841 (August 5, 2006-19:12:58)

* * *

Nagtuo ko nga wala ako sa hustong posisyon kon mokomentaryo ko mahitungod niini sa pagkakaron. Mas maayo nga maoy motubag niini ang tagdumala sa Calamba Cemetery kay siya ang makahatag og mas takdo ug mas pintok nga tubag ug pagpasabot ngadto sa atong texter.

Mao nga manghinaot kita nga pinaagi niining lindog, makaabot ngadto sa tagdumala sa Calamba Cemetery ang reklamo sa usa nato ka texter ug ikapasabot usab nila ang ilang habig aron maklaro ang tanan ug matubag ang pangutana sa atong texter nga reklamante.

(Sumbong ug reklamo? Text sa 0910-8105522)