Kinsa ang namakak?

Kon ari ka maminaw ni Kongresista Antonio Cuenco, daw sa makatoo ka nga wala siya mohatag og kwarta ngadto ni drug suspect Hung Chin Chang, usa sa 12 ka akusado pagpamuhat og shabu sa Mandaue, kinsa naila usab sa angga nga Simon Lao.

Apan kon maminaw sab ka ni Atty. Gloria Lastimosa-Dalawampu, ang abogado ni suspected shabu laboratory financier Calvin Tan, makaingon usab ka nga tinuod g'yod nga si Cuenco mitunol og kwarta ni Simon Lao.

Usa sa nahuna-hunaan ni Cuenco nga paagi sa pagmatuod nga wala siya mamakak, mao ang pagpakuha og polygraph test, kanang naila kaayo nga "lie detector test."

Apan, walay plano si Dalawampu nga magpa-lie test kay matud pa wala siya mamakak ug ang husto kuno nga paagi ni Cuenco mao ang pagpa-examine niya sa usa ka doctor nga espesyalista sa mata.

Unsaon nga gibarugan man g'yod ni Dalawampu nga maayo pa ang iyang mata, ug nakita g'yod niya sa gilay-on nga mga duha ka metros, nga si Cuenco mitunol og linibo ka pesos nga kwarta ni Lao.

Matud pa nga ang pagtunol ni Cuenco og kwarta ni Lao gihimo human si Lao miatubang sa korte ug mitug-an nga si Calvin Tan maoy nagsugo kaniya pagpangita og kapalitan og daghang acetone ug ubang kemikal sa paghimo'g shabu.

Kon imong huna-hunaon, daw sa dili katuohan nga si Cuenco mohatag og kwarta ni Lao diha g'yod sa korte, apan mao usab kini ang punto nga wala magustohi ni Dalawampu kay matud pa bulgar kini nga mitunol sa kwarta sa drug suspect.

Ang witness ni Dalawampu nga matud pa nakakita paghatag ni Cuenco og kwarta ni Lao mao si Derly Cagais, ang aide ni Dalawampu nga diha g'yod tupad ni Cuenco sa maong higayon ug wala lang hiilhi sa kongresista.

Buyno, mas maayo tingali nga dugangan ni Dalawampu ang iyang testigos aron pagmatuod sa iyang pamahayag.

Alang ni Cuenco, kon nagtug-an siya sa tinuod nga wala siya motunol og kwarta ni Lao, maayo. Apan kon namakak si Cuenco, ang Ginoo wala matulog ug tingali'g moabot ang adlaw nga maymayan ra siya.

Mora'g makatoo g'yod hinuon ka nga mihatag og kwarta si Cuenco tungod kay ang testimoneya ni Lao sa hukmanan, nagpalig-on man sa kaso batok ni Calvin Tan.

Husto usab ang pamahayag sa uban nga si Dalawampu posible nga nagbuhat-buhat lang og estorya kay aron nga molutaw nga binayran ra ang pamahayag ni Lao batok sa iyang kliyente.

Ang akong ikasulti, lisud karon ang paghukom kon kinsa kanilang duha ang namakak.

* * *

Dili imposible nga mahitabo ang giingong anomaliya diha sa Bureau of Immigration diin pangwartahon sa mga mapahimuslanong ahente sa maong buhatan ang mga "undocumented foreigners" nga moabot dinhi sa nasud.

Unsaon, ingon ana na man lang ang atong pangagamhanan. Tan-aw nako, bisan kinsa pa lagi ang mamahimong presidente sa nasud, lisud na nga masumpo ang graft and corruption sa gobyerno.

Kadtong mga tawo nga kusog kaayong mosaway sa mga binuang, mohilom man sa pagsaway kon nakasulod na sila sa poder. Sumala god, tan-awa kanang uban diha sa kagamhanan karon, unsa man na sila kaniadto?

Sila maoy mga sabaan kaayo. Kining mga nagsaba-saba sa pagka karon, hatagi ra god na og pwesto sa gobyerno, dili ba tak-um ang ba-ba ana nga mora'g gi-rugby. He! He!