EDITORYAL — Dose anyos na kita

Agosto 23, halandumong adlaw sa kinabuhi sa Banat News. Ning maong adlaw, dose katuig nang milabay (1994) nahimugso kining maong pamantalaan isip labing unang tabloid sa Binisaya dili lang sa Sugbo kundili usab sa tibuok nasud.

Sumala sa editoryal nga napatik sa Vol. 1 No. 1, ning atong mantalaan, gitukod ang Banat News aron sa pagsilbe sa komunidad nga Sugbuanon pinaagi sa paghatag ngadto sa mga magbabasa og mga balitang mahinungdanon, makalingaw ug matulon-anon.

Wala kita mosimang sa maong tinguha ug gani ato kining gipadayon karon nga nagtungtong na kita sa ika-dose katuig nga pag-alagad sa mga Sugbuanon.

Sud sa dose ka tuig daghang kaayohan ang napupo sa Banat News alang sa bumabasa niini. Ang labing mahinungdanon mao ang pagkasakop na karon ning atong mantalaan sa The Philippine Star Group of Publications, ang labing tinamud nga pundok sa mga pamantalaan sa Manila.

Among saad ug pasalig ngadto sa nagkadaghang suki sa Banat News: Atong ipadayon ang pag-alagad sa publiko sa walay tihik-tihik nga pag-alagad.

Daghang salamat sa inyong nagpadayong pagpaluyo ning atong mantalaan!