Maayo ba god?

Ang paghusay sa kaso nga parricide nga gipasaka batok ni Ruben Ecleo Jr. mosamot kalangan kon itugot ang tinguha sa akusado nga ibalhin kini og laing huwes.

Buot ni Ecleo nga si Regional Trial Court (RTC) judge Geraldine Faith Econg muondang na sa paghusay sa maong kaso ug nga lain na nga huwes ang pahusayon niini.

Daw dunay katinuoran ang pagtoo sa mga private prosecutors nga ang tinguha ni Ecleo nga laing huwes na ang pahupton sa kaso, gitumong lang aron malangan ang paghuman sa kaso. Si Ecleo gipasanginlan nga maoy mipatay sa iyang asawa nga si Alona niadtong 2002.

May rason usab si Ecleo magduda nga basin og dili na patas ang pagtan-aw ni judge Econg sa merito sa kaso kay ang huwes classmate man diay ug sa gipatay nga si Atty. Arbet Sta. Ana Yongco.

Sa wala pa patya si Yongco kaniadtong Oktubre 11, 2004 sa giingong tulo ka sakop sa Philippine Benevolent Missionaries Association, siya ang nagdumala sa kasong parricide nga gipasaka batok ni Ecleo.

Kon ako hinuo'y pagbut-on, gusto ko nga si judge Econg mopadayon sa paghusay sa kaso. Misalig ko sa katakus ni judge Econg nga bisan og classmate sila ni Arbet, apan neutral siya nga mohukom sa kaso.

Una, si Econg mismo maoy mipahibalo nga classmate sila ug ni Yongco dihang ang pagpatay sa maong abogada gilambigit ni Atty. Fritz Quiñanola sa kasong parricide batok ni Ecleo.

Kaniadtong Hulyo 13, nagbasolay man god sila si Quiñanola ug ang abogado ni Ecleo nga si Orlando Salatandre kon kinsa ang nakaingon nga nalangan ang paghusay sa kaso.

Nakasulti si Quiñanola ngadto ni Salatandre nga "Kon wala pa bitaw ninyo patya si Atty. Yongco dugay ra unta nga nahuman ang paghusay ning maong kaso."

Misamot na g'yod hinuon ang lalis sa duha ka abogado. Diha nga si judge Econg miingon nga kon ang pagpatay ni Arbet ilambigit nila sa kaso ni Ecleo, mapugos siya pag-inhibit kay classmate sila og si Arbet.

Kon si judge Econg duna pay huna-huna nga mohimo siya og bayas nga hukom sa maong kaso kay classmate sila ni Arbet, dili na lang unta siya mobutyag niini kay wala man masayod sila si Ecleo.

Kon ibalhin god og laing huwes ang kaso ni Ecleo, mosamot kalangan ang paghusay niini kay ang bag-ong huwes nga mohupot sa kaso kinahanglan pa mang mobasa sa "taga hawak sa tawo" nga gibag-on sa mga court documents.

Unsa kaha kadugaya mahuman og basa ang taga hawak nga dukomento?

Upat na ka huwes ang nagbanos-banos paghusay niining maong kaso kay nagpuli-puli lang ang depensa ug prosekusyon sa pag-awhag nga ibalhin og laing huwes ang maong kaso.

Gikan ni RTC judge Anacleto Caminade, ngadto ni judge Generosa Labra, judge Ireneo Lee Gako Jr, ug karon ni judge Econg. Ang tinuod tagdugay kaayo nga mosibog ang paghusay sa merito sa kaso.

Mga "sidelights" lang ang gituki sa korte. Sama sa tinguha nga si Ecleo ibalik sa pagpapriso. Wala pa gani kini maresolbar, naa na say laing isyu ang pagpa-inhibit ni judge Econg.

Dili imposible nga si Salatandre modangop sa taas nga hukmanan panahon nga isalikway ni judge Econg ang ilang awhag nga mo-inhibit ang huwes sa kaso.

Kon kini mahitabo, maabtan pa og "siyam-siyam" nga mahuman ang paghusay sa kaso. Ang paghusay sa awhag nga si judge Econg mo-inhibit sa kaso ni Ecleo himoon kini unya pa sa Septiyembre 14.