Binagyo ang Baguio

Ano ba ang bagyo? Ito’y hangi’t ulan
Na kung dumarating ay halos sabayan;
May bagyong mahina -— gusto ng halaman
May bagyong malakas -— dala’y kamatayan!

May ilang araw nang panaho’y masama
Dahil sa may bagyong sa bansa’y tumama;
Malayo man ito’y lumikha ng baha
At mga landslide -— maraming sinira!

Sa Metro Manila at karatig-bayan
Lumihis ang bagyo pero nagpaulan;
Ang ulan ay higop ng hanging kanluran
At pabugsu-bugso pero magdamagan!

Mabababang pook ay agad binaha
Tanima’t lansangan ay biglang nawala;
Bahay ng squatters pagka’t mahihina
Sa agos ng tubig ay biglang nawala!

Binagyo ang Baguio at doo’y nawasak
Tahanan ng dukha at tahanang tanyag;
May mga lugar pang biglaang nawarak
May mga namatay -— libo ang umiyak!

At sa Baguio City ang sigwang dumating -—
Malakas na ulan, dambuhalang hangin;
Kaya ang landslide ay nagsapin-sapin
Kumitil ng buhay -— lunsod nagupiling!

Ang Laoag at Vigan sa Ilocos Norte
Mga pook itong sa ating history —
Mga tourist spot dinarayo lagi
Binagyo nang husto -— tao’y naturete!

Mga bahay doon at mga taniman
Winasak ng baha, ng hangin at ulan;
Mga ilog, sapa at mga palayan
Lumubog sa tubig -— naging karagatan!

Tayo ay magdasal ang bagyong marahas
Kung daraan dito tayo ay maligtas;
Sana kung babagyo ay hindi malakas
Upang itong bansa ay hindi maghirap!