Hagit ni Tommy

May katinuoran ang pagduda ni Mayor Thadeo Ouano nga duna lay mga kontra niya sa politika nga buot modaut sa iyang dungog mao nga migamit kini sa media aron padak-on ang isyu nga kapakyas niya pag-apod-apod sa kabarangayan sa mga 100 ka garbage bins.

Angay'ng magmatngon g'yod si Mayor Ouano kay dili man g'yod kalikayan nga dunay mga kontra niya sa politika nga mangita g'yod og mga isyu nga makadaut niya. Wala man sila masayod nga ang maong mga garbage bins gitagana para resirba kon maguba na kadtong giapod-apod sa kabarangayan.

Husto si Mayor Ouano sa iyang pagmahay nga dihang namalit siya og 8,000 ka plastic garbage bins ug gipang-apod-apod kini sa kabarangayan, daw sa walay nakabantay.

Nagtoo man god ang uban nga kadtong mga garbage bins, kon sudlanan sa mga basura nga wala ipang-apod-apod, gipasipad-an na lang.

Ingon ana g'yod na, hapit na man ang eleksyon, nangita na sila og mga isyu aron dauton ang dungog sa anaa sa kagamhanan.

* * *

Husto usab ang hagit ni mayor Tomas Osmeña ngadto sa higpit niyang karibal nga si Alvin Garcia, kinsa pirmi nga mamasangil nga gitikasan siya maong napilde siya sa eleksyon.



Ang hagit ni Osmeña nga angay'ng himoon ni Alvin sa labing dali nga panahon mao ang pagtumbok kon diin nga presinto siya nga natikasan, aron nga kadtong mga botante sa maong presinto atong patug-anon kon kinsa g'yod ang ilang gibotahan.

Tambag nako, mas maayo tingali nga ang atong himoan og sampol mao ang presento mismo ni Alvin. Okey ka ra ba Mayor Tom? Kapoy kaayo nga sigi lang ta og ingon nga natikasan, nga nabayran ang mga botante, nga miabag ang mga maestra sa pagpanikas, unya walay kamatuoran.

Isip abogado, si Alvin mopresentar gayod og kamatuoran sa iyang mga ipanulti, kay kon dili maisip ra kini nga "mere alibi" sa iyang kapildehan.

* * *

Grabeha sab niadtong mga polis nga mangilkil sa mga tigbaligya og drugas uy. Law-ay kaayo ang ilang gihimo. Wala pa sila matagbaw nga magdawatan pa sila gikan sa mga tigpasiugda sa illegal nga sugal, apilon pa g'yod ang tigbaligya og illegal nga drugas.

Daghan ko og mga nahinabi nga mga opisyal sa kapolisan, maarang-arang pa kon modawat ang polis gikan sa mga tigpasiugda sa illegal nga sugal kay dili pa kaayo tantong salawayon, apan kon gikan sa druglord, pastilan.

Tabla ra ni niadtong polis nga kusog kaayong manakop, unya ang uban sa masakmit niyang drugas ipabaligya usab niya sa iyang higala nga tigpayuhot og illegal nga drugas.

Mangutana mo og kinsa? Hinay diay mo'g intelligence network kon mao na.

Si Mayor Tommy gani wala na masurpresa nga dunay unom ka polis nga gipasanginlan nga tigpangayoan og kwarta gikan sa giingong druglord nga si Tatay Regis.

Kaniadto, dunay sakop sa media nga nagtinguha nga moadto unta sa maong giingong drug pusher. Aw unsa pa, mangayo tingali. Apan ang silingan nga gikombinsir nga magpauban, mibalibad.

* * *

Nahibulong kaayo ko kagahapon sa buntag, pag-agi nako sa P. del Rosario pwerteng sinawa na sa pikas lane sa karsada, aspaltado na. Pag-agi nako diha niadtong Huwebes sa hapon, gasang-gasang pa.

Paminaw ko, karong buntag, apil na ang pikas nga lane sa karsada nga maaspalto. Akong balikon, salamat ni Mayor Tommy sa pag-atiman sa atong mga karsada.

Kon magkaduol na g'yod ang Asean Summit karong Disyembre, sigurado ko nga pulos sinaw na ang atong kadalanan dinhi sa dakbayan.