Ilad sa text na sab!

Usa ka magbabasa niining lindog nga tag-iya sa cellphone number 0916-3026186 mitaho kanako nga usa siya sa nakasinati bahin sa pangilad pinaagi sa text. Kana bitaw'ng gitawag og text scam nga nagpadayon pagkaylap hangtod karon. Wala hinuon siya mailad kay nakabantay man dayon siya nga tinonto kini.

Matud pa sa atong texter, gipadad-an siyag congratulatory message sa usa ka tawo nga nagpaila sa ngalan nga JGL (inisyal). Ang cellphone number ni JGL mao ang 0917-9892089. Ang text ni JGL nagpahibalo kaniya nga nakadaog (kuno) siya og P950,000.00 nga second prize sa promo sa Phil. Charity Foundation.

Karaang kansiyon na kini. Kining maong ngalan maoy kanunay dad-on o gamiton sa mga mangingilad pinaagi sa text scam. Apan ambot kon nailhan pa kaha kining mga tawhana sa matuod nga mga sakop sa maong foundation. Posibleng wala. Gigamit lang nila ang ngalan sa maong foundation aron mahimong kredible ang ilang paghimo og mga lansis ngadto sa tawo nga buot nilang ilaron.

Sublion ko lang ang pagpahinumdom kaninyo, mga suki, nga sa higayon nga makadawat kamog text nga nagpahibalo nga ang inyong cellphone number nakadaog sa usa ka raffle promo, ayaw gayod kamog tuo niini. Walay sukaranan nga makadaog kamo sa promo nga wala ninyo salmoti. Mao nga kon tukion pag-ayo, walay basehanan kining mga congratulatory message nga gipakaylap sa mga badlongon sa katilingban nga gustong mangilad sa ilang isigkatawo.

Kini gong pangilad tsamba-tsamba lang. Kon motuo ang ilang prospek, seguradong mailad. Pero kon dili motuo, dili kini makapatagam sa mga mangingilad. Magpadayon gayod sila sa pagpasalir sa ilang tinonto hangtod nga makabiktima sila.

"Kanus-a pa man intawon madakpan kining mga mangingilad sa text?" Nagkanayon ang atong texter.

Ang tubag mao nga lisod silang dakpon tungod kay lisod man ang pag-trace kanila kay cellphone man ang gigamit. Bentaha unta tingali kon landline pa. Bantaye lang gyod nga dili malingla.Bantayi sab kini si JGL nga tag-iya sa cellphone number 0917-9892089 kay tingalig padad-an usab kamo niyag text scam.

(Sumbong ug reklamo? Text sa 0910-8105522)