Si Pakman ug ang kahiusahan

Kaniadtong Domingo nangharos ang mga Pinoy nga boksidor batok sa mga Mehikanong boksidor nga nanulong dinhi sa nasud. Pulos gipapauli sa mga Pinoy nga boksidor ang mga mehikanong boksidor nga pildero. Sila si Gerry Peñalosa, Csar Amonsot, Jimrex Jaca ug Manny Pacquiao mipasigarbo sa Pilipinas sa tibuok kalibutan.

Ang away sa mga Pinoy nga boksidor ibabaw sa ring wa lamang mopasigarbo sa mga Pinoy ngadto sa tibuok kalibutan kon dili mipahiusa usab kini sa katawhang Pilipinhon nga nagkabahinbahin tungod sa bugno sa politika.

Ang mga Pinoy nga boksidor mipakalma usab kini sa mga badlungon sa katilingban sama sa mga kawatan, tulisan, manglabnihay ug uban pa. Mipaminus usab kini sa mga sabongero sa pag-adto sa buwangan ug mipaubos sa gidaghanon sa mga manimbahay sa atong simbahan. Miluagluag usab kini sa grabe nga traffic sa atong kadalanan kay mipahuway sa pagpamasada ang mga taxi ug jeepney drivers Kini tungod kay misaksi sa away ni Pacman ug Chololo sa Mexico.

Si Pacman mipahiusa na usab sa katawhang Pilipinhon nga way pahuway sa kagubot sa politika. Temporaryo man ang nahatag nga kahiusahan ni Pacman ngadto sa katawhan pero at least nakatagamtam ta og kadiyot nga break sa politika.

Tungod niini di nako kalikayan ang pagpangindahay nga unta matag adlaw adunay away si Pacman ug uban nga boksingero ibabaw sa ring. Gani adunay mga panahon nga mangindahay ta nga aduna kanunay nga moabot nga trahedya, kalamidad ug katalagman dinhi sa nasud kana tungod kay nagkahiusa usab kita niining maong mga hitabo. Kining maong mga pangindahay namugna tungod sa atong kahigwaos nga mahatagan na unta ug kahiusahan ang katawhan sa nasud aron kini mapalambo.