Pagtuo ingon nga usa ka relasyon

Ang Dios Miingon

Pamalandong

Hulyo 2, 2006: Ikanapulog-duha nga Domingo sulod sa tuig

Mga Pagbasa: Kaal. 1:13-15; 2; 23-24/2 Cor. 8:7, 9:13-15/Mk. 5:21-43

Usa sa mga maanindot nga paagi sa pagpatidlum mahitungod sa pagtuo mao ang paggamit sa imahen sa usa ka relasyon. Ang usa ka relasyon motubo, mohamtong, ug molipang kon adunay panagkukabildo, ug panagtagbo tali sa tawong nituo ug sa gituohan ba kaha.

Si Jesus nihimo og milagro kini tungod kay ang nangayo niini nipadayag man sa ilang dakong pagtuo kaniya. Ang babaye nga nangayo og kaayohan nakaangkon dili tungod sa milagro lamang kondili tungod sa iyang pagtuo. Ang anak babaye ni Jairo nabanhaw tungod sa pagtuo nga gipadayag ni Jairo. Makaingon ta nga kadtong mga milagroha nagdala og hingpit nga kausaban sa mga tawo nga hingtungdan.

Ang kinabuhi usahay kataw-anan ug makalibog. Padayon ang tawo sa pagtuki sa mga butang tinago ug pagkaplag og tubag sa mga misteryo apan padayon gihapong nasinati niya ang tumang kahaguka, kawalay padulngan ug kawalay paglaom. Kini tungod kay nahimong saag ang puntirya sa atong pagtuo. Adunay nagtuo nga tungod sa nahuptan nilang gahom, mahimo na nilang gambalayon ang latid sa hustisya segun sa ilang kapritso. Adunay uban nga tungod sa ilang kabatid mahimo nang mohimo og "milagro" nga walay sangpit-sangpit sa ngalan sa Ginoo! Ang hinungdan: Wala nila ma-establisar ang usa ka mas suod ug mas personal nga relasyon ngadto sa Dios.

Natural lamang ang magduda ug magpanuko sa pagtugyan sa pagsalig. Kay adunay mga tawo o dili ba kaha mga impluwensiyadong hut-ong nga mohatag kunohay og suporta sa linupigan apan mga numero uno diay'ng mga manunukob. Apan angay untang huna-hunaon nga ang Ginoo dili sama niini. Sa higayon nga itahan ta kaniya ang tanan kanato, siya ang maantigong mopahimutang sa dapit diin kita haom. Kay supak sa kinaiya sa Ginoo ang mogambalay sa bakak aron pagtabon sa matuod.