EDITORYAL — Nganong karon pa ang order?

Matud pa sa balita, si Presidente Gloria Arroyo mimando ngadto sa National Bureau of Investigation (NBI) nga dali-dalion ang imbestigasyon sa kamatayon ni Elpidio "Jojo" dela Victoria.

Ang Presidente mihimo sa maong lakang human kini nakadawat og suwat gikan sa New South Wales Young Lawyers Environmental Law Committee diin ang pangulo sa maong pundok miawhag kang Mrs. Arroyo nga dalion ang pagsulbad sa kaso ni Jojo.

Sa maong higayon, mihangyo usab ang maong langyaw'ng pundok sa paghatag og igong protection ngadto ni abogado Antonio Oposa, ang kauban ni Jojo sa kampanya batok sa mga environmental destroyers.

Niadto pang Abril nadawat sa Malacañang ang suwat ni Dr. James Smith, presidente sa NSW Young Lawyers Environmental Law Committee, apan adto rang miaging adlaw miluwat si Mrs. Arroyo sa iyang order nga dalion ang imbestigasyon sa kamatayon ni Jojo.

Nganong wa man dayon ipakanaug ang order maoy gustong mahibaw-an sa mga suod nga higala ni Jojo.