Sobre sa simbahan

Adunay magbabasa nga misumbong kanamo nga adunay mga badlongon sa katilingban nga migamit sa ngalan sa simbahan o parokya sa ilang modus operandi. Ang maong magbabasa gayod mismo ang nakadiskubre sa maong tinonto. Makaduha kini mahitabo kaniya pero wala siya mailad.

Sumala sa iyang giasoy, usa ka adlaw niana may tawo nga miabot sa iyang pinuy-anan. Nagpaila kini nga miyembro sa Parish Operations Commission sa parokya sa ilang dapit. Maoy tuyo sa maong lalaki ang pagpangolektag donasyon. Ang gigamit niining sobre mao ang sobre sa pamisa.

Pero wala mailad ang atong magbabasa. Nakaalinggat man siya nga sa ubos nga bahin sa sobre adunay nahisulat nga "kining sobre dili magamit sa gawas niining simbahan."

Maong gikuwestiyon niya ang tawo nga nagdala sa maong sobre. Kaha nabuko, midali kinig sibat nga wala gani manamilit. Wala kini makaesplikar sa tubag sa gipasupot niyang pangutana.

Laing higayon, may tawo nga mitungha sa iyang gipuy-an. Nagpaila kini nga representante sa Donations and Collections Commission sa usa ka lain nga parokya. Nagdala gihapon og sobre aron mangolektag donasyon. Iya kining gipangutana kon nganong miabot man kinig pangolektag donasyon sa ilang lugar nga dili na man sakop ang maong dapit sa parokya nga maoy nagprodyus sa maong sobre.

Wala motubag ang tawo sa iyang pangutana. Milakaw hinuon kini nga nagbagulbol sa pag-ingon: "Kadaghan og kuti-kuti. Di man moprangka kon mohatag ba o dili!"

Para nako, dili mabasol ang atong magbabasa kon nganong gikuwestiyon niya ang kalehitimo sa pagpangolektag donasyon. Iya kanang katungod. Gawas pa, may nasil-ip sab siyang buslot sa pangatarongan nga nakapaturok sa iyang katahap. Ug posibleng nangilad lamang gayod ang maong tawo kay wala man sila makapresentar og balidong mga rason dihang gisukit-sukit na sila sa atong magbabasa.

* * *

(Sumbong ug reklamo? Text sa 0910-8105522)