P1B nga ilad

Sa di pa ta manayaw sa kadalanan pagsaulog sa nag-ung-ong nga kaalaotan sa mga kawatan sa kagamhanan tungod sa P1 bilyon nga gisaad ni Pres. Arroyo sa kampanya batok sa pangurakot, angayng mangayo ta og klarong mga tubag sa mosunod nga mga pangutana:

• Duna bay kuwarta (may nahibilin pa ba sa gigahin nga higanteng suburno nga gikahadlokang ipabaha na sab ngadto sa mga sakop sa Kongreso aron pagsegurong lumsan na sab nilang ikaduhang impeachment complaint nga gihikay sa oposisyon)?;

• Kon duna man, iya ba gyong giluwatan ang tibuok kantidad (hangtod ra ba karon wa pay nakita bisan anino na lang sa iyang gipagawal pag-ayong subsidy sa noodles ug sardinas alang sa labing kabos nga mga molupyo)?; ug

• Mag-unsa mang P1 bilyon kon isalig sa di kasaligan nga Ombudsman (ang iyang tinudlo nga si Merceditas Gutierrez, classmate sa iyang banang si Mike Arroyo, nakiglalis na man gani sa Korte Suprema kay di ganahang mosugot sa sugo pagukod sa anomalusong mga transaksiyon sa administrasyon)?

* * *

Usa sa mga yawe sa bisan unsang kampanya batok sa pangurakot mao ang pagtudlo sa kabataan, ang tinuod nga mga paglaom sa nasud, sa kabililhon sa kaligdong ug kabuotan. Apan niay ngil-ad nga sanglitanan nga gipakita ang kadagkoan sa Departamento sa Edukasyon (DepEd):

Human nabisto sa TV Patrol Central Visayas ang eskandalo sa pagtudlo sa kadagkoan sa eskuylahan sa pipila ka amihanang mga lungsod sa mga tubag sa pasulit ngadto sa ilang mga tinun-an aron pagsegurong tag-as ang ilang kuha-nga nisangpot sa pagkasuspenso sa pipila ka opisyal-gikatahong gimandoan sab sa dakong opisyal sa DepEd ang mga magtutudlo pagpasabot nganong di sab sila silotan, di tungod sa ilang papel sa makauuwang leakage sa pasulit, kon dili tungod sa ilang pagdangop sa mga sakop sa media sa way pagpananghid sa ilang kadagkoan.

* * *

Sa ato pa, napugos lang ang DepEd pagsuspenso sa mga opisyal nga nahilambigit sa eskandalo kay nahibaw-an na man sa katawhan pinaagi sa ABS-CBN, labi na nga ang usa sa mga opisyal nasakpan gyod sa kamera nga nanghulga ug nipalayas ni Rico Lucena ug sa iyang crew nga igo lang nangutana labot sa tikas sa pasulit. Ang kinakusgan nga ebidensiya nga taphaw rang ilang pagbadlong sa kahiwian mao ang ilang pag-ila ug pagpanggukod sa tanang gidudahang mga tinubdan sa exposé sa TV Patrol.

Ang tinuod nga mensahe sa DepEd ngadto sa mga magtutudlo, mga ginikanan ug, labaw sa tanan, sa mga tinun-an: Silotan kunohay ang mga nasakpan apan mas dakong atraso mao ang pagbisto ngadto sa kadaghanan sa ilang mga tinagoan nga makapabuong sa kadungganan sa DepEd, bahala na kon ang paghimo sa ingon makapatigbabaw sa mas dakong kaayuhan sa mas daghan.

* * *

Email: [email protected]