Sayang ang death penalty law

Insakto kaha ang lakang sa kagamhanan pagkanselar sa balaod nga nagpahamtang og death penalty niadtong nalambigit sa mga linuog nga krimen? O naghatag ba kaha kini og hinungdan pagsaka na usab sa mga dagkong krimen sa nasud?

Sa niaging semana, tulin nga nakapasar sa Senado ang balaod nga nag-abolish sa death penalty human sa pipila ka mainitong debate sa Ubos Balay Balauranan.

Ang death penalty, nga gireimposar kaniadtong 1994, nagtugot lamang sa lethal injection isip maoy paagi pag-execute sa mga anaa sa death row. Sa pagkakaron, mosubra na sa 1,000 ka death convict ang nagpaabot sa ilang execution sulod sa New Bilibid Prison.

Lakip sa gipahamtangan sa silot kamatayon mao kadtong mga konbiktado pagdagit sa managsuong Jackielyn ug Marijoy Chiong niadtong 1997.

Nakit-an ang patay'ng lawas ni Marijoy didto sa lungsod sa Carcar pipila ka adlaw human sila gidagit. Apan hangtud karon, wala gayud maugkati ang lawas ni Jackielyn kinsa gituohan na usab nga patay na. Ang duha giingong gilugos human sila dagita gikan sa usa sa mga nag-unang shopping center sa dakbayan.

Ang pagkanselar sa death penalty miani og mga pagdayeg gikan sa mga nagkalainlaing sektor sa nasud ug sa ubang human rights group sa kalibotan. Nag-una sa mga midayeg niini mao ang Simbahang Katoliko nga dugay rang milusad og kampanya batok sa death penalty law.

Dakong pangatarungan sa simbahan ang pagkainutil sa maong balaod batok sa nagka-grabe nga kriminalidad sa nasud. Matud niini nga bisan pa sa maong balaod, pabilin gihapon nga wala matandog ang mga kriminal base usab sa nagsakang kaso sa mga pagpatay, paglugos ug uban pang heinous crimes sa nasud.

Gani, ang European Commission midayeg usab sa lakang pag-abolish sa death penalty sa nasud. Matud pa ni Benita Ferrero-Waldner, ang komisyoner sa external relations sa EU, nga sila nalipay sa desisyon sa kagamhanan pagkanselar sa death penalty law.

Nanawagan usab ang EU sa mga nasud nga nagtiner og death penalty sa pagsunod sa Pilipinas pag-abolish sa maong balaud tungod kay usa kini ka lakang nga naghatag og respeto sa tawhanong katungod.

Apan ang pagkanselar sa death penalty sa nasud miani usab og pagsaway sa ubang mga sektor, ilabina kadtong mga anti-crime advocate. Matud nila ang maong lakang sa kagamhanan usa ka dakong kapildihan alang sa krusada batok sa kriminalidad tungod kay dili na mahadlok ang mga kriminal sa ilang pagabuhatan.

Lisod usab hunahunaon, matud nila, nga kon hingpit na nga mawagtang ang death penalty, dili malikayan nga mosaka pag-ayo ang kriminalidad nga maoy maghatag og dakong mantsa sa daan nang gusbat nga kahimtang sa kahusay ug kalinaw sa Pilipinas.

Ug unsa kahay dangatan sa nasud kun dili na makontrol sa otoridad ang pagpatunhay sa kahusay ug kalinaw? Pabilin pa kaha kining attractive sa mga langyaw'ng mamumuhonan ug turista?

Alang kanako, piang ang death penalty law sa nasud tungod kay klaro kaayo nga kulang kini sa implementasyon aron pagsumpo sa kriminalidad. Hinuon, dili ko pabor sa pagwagtang niini tungod kay ang maong lakang dili sulbad sa problema sa atong peace and order karon.

Sa akong nakita, dako unta og kapuslanan ang death penalty kon kugi pa ang kagamhanan pag-implementar niini. Ang nakapait kay gamitan usab sa kagamhanan og pamolitika ang maong balaod pinaagi sa pagpugong sa execution sa mga anaa sa death row.

Migawas hinuon nga walay gamit ang death penalty gumikan kay wala kaayo kini gamita sa kagamhanan. Kay kon kugi pa ang kagamhanan pag-implementar sa maong balaud, dili ikalimod nga makubsan gayud ang mga kriminal.