Impeachment: To prove Gloria's innocence

Gituyo ni pagbutang sa Konstitusyon, aron ang katawhan adunay recourse batok sa mga kahiwian nga mahimo sa incumbent president, ug sa samang higayon, paghatag og opportunity pag-dispute ug pagpanghimakak sa mga alegasyon nga gipasaka batok sa hingtungdan. Democratic gyud kaayo.

Maoy hinungdan nga sa wa'a pa ikapasaka ang unang kaso sa impeachment batok kang Gloria, iyang gihagit ang oposisyon to "Impeach me," tungod kay hingpit ang iyang pagtuo nga, among others, wa'a siya manikas sa miaging eleksiyon.

Apan, ang iyang mga bata-bata ug mga alalay (nganong duna man siyay mga bata-bata ug mga alalay nga independent body man unta ang Kongreso?) mihikaw kaniya sa kahigayonan pagprobar nga wa'a siyay kasal-anan nga nahimo batok sa lungsod.

Karon, niining gihugon-hugon nga laing kaso sa impeachment ang ipasaka batok kang Gloria, gihugon-hugon usab nga dili kini maka-first base, tungod kay seguro kining patyon sa mga alalay ni Gloria.

Ngano man? Nganong di man sila gustong makaprobar si Gloria sa iyang pagka-walay sala? Nganong di man sila gusto nga mapauwawan ang oposisyon tungod kay seguro man kaha sila nga limpiyo si Gloria? Unsa may ilang kahadlokan?

Giatubang ni Erap ang impeachment proceeding nga gipasaka batok kaniya. Ambut ngano nga mi-walk out man sad sila . Wa'a lang hinoon kamatud-i ang kahugaw ni Erap. Iya sang giatubang ang plunder case nga gisang-at batok kaniya.

Nganong di man gusto ang mga Congressmen ni Gloria nga muatubang usab siya sa bisan unsa nga kaso nga ipasaka batok kaniya? Nganong hadlok man sila? Unsa may ilang kahadlokan?

Karon, tungod kay nahadlok ang mga Gloria Congressmen pag-atubang sa impeachment proceeding, di gyud matubag ang daghang mga pangutana, ug di gyud kahatagag katin-awan ang daghang pamasangil batok kang Gloria.

Ug tungod kay umaabot man ang eleksiyon, ug di man kalikayan nga mautingkay ang maong mga isyo, unya di man kandidata si Gloria, silang mga Gloria Congressmen maoy manubag sa maong mga pangutana, ug maoy mohatag og hingpit nga katin-awan kon ngano nga di sila buot nga mogawas ang kamatuoran. Ma-defensive sila. Mao ba kaha kini ang hinungdan ngano nga di sila gustong mag-eleksiyon?