Kusganong gipanghimakak ni Gobernador Rosette Lerias sa Southern Leyte ang pasangil nga iyang gi-hijack ang walo ka tonelada nga hinabang sa Malaysia alang sa mga biktima sa katalagman sa Guinsaugon sa St. Bernard. Giduaw ming Lerias sa ABS-CBN Broadcast Complex sa Jagobiao, Mandaue City dala ang daghang mga dokumento pagmatuod nga wa niya kawata ang mga hinabang ug nga nangandam na gani siya pag-apud-apod ini ngadto sa mga biktima.
Atubangan sa nahaunang mga taho nga nakahilak si Mayor Maria Lim sa St. Bernard sa kahiubos ug huyhoy ang abaga nga nipauli sa St. Bernard uban sa tulo ka basiyo niyang dump trucks gikang nabawo pagsugat sa kargamento sa Tacloban City airport, si Lerias niingon nga gawas nga gipahibawo niya si Lim sa tinuod nga kahimtang sa mga donasyon ug nga iya pa gyong patambungon ang mayor sa aktuwal nang pagpanghatag sa mga hinabang.
Human sa taudtaod nga pagpakahilom sa mga pagsaway batok niya, si Lerias naalarma na tungod kay gawas nga nabaniog na sa media sa Sugbo ug ubang bahin sa nasud ang kadagkoan sa ATHena Inc., ang kahugpongan nga natukod pagsubay sa tanang lokal ug langyawng mga donasyon alang sa Guinsaugon, pormal nang nipasangil nga giilog sa gobernador gikan sa mayor ang mga hinabang nga pagkaon ug mga gamit sa panimay gikan sa Malaysia.
Si Atty. Rico Rentuza sa ATHena Inc. nihulagway sa katin-awan ni Lerias pagkuha sa langyawng hinabang ug pagtipig sa kargamento inay iapud-apod dayon ngadto sa mga biktima nga nisukwahi sa opisyal nga mga dokumento nga gihuptan ni Lim ug nga dakong insulto sa mabuot nga katawhan sa St. Bernard. Giawhag niyang gobernador sa paghunong sa iyang gihimo sa di pa hingpit nga mawad-an og pagtahud niya ang mga molupyo.
Nahadlok kong usa sa hinungdan sa away mao ang suwat sa kagamhanan sa Malaysia ngadto nilang Lim ug Lerias. Managsama ang unod sa mga suwat (pulos pinetsahan og Abril 28, 2006) nga nadawat nilang Lim ug Lerias gikan ni Charge d' Affaires Wan Jaafar Wan Mahamud. Uwahing bahin sa suwat nagkanayon: "In this connection, the Embassy would be grateful if the Honourable Mayor (Governor) could attend the hand over ceremony and meet the team and officials of the embassy as well as to receive and deliver the goods from the Airport to the landslide victims in Guinsaugon, St. Bernard."
Si Lerias giawhag pag-andam og mga sakyanan nga makahakot sa mga hinabang ngadto sa St. Bernard sa labing daling panahon; samtang si Lim gipahibawo nga samang imbitasyon ang gihatag ngadto sa gobernador. Posible kaha nga ang ka-maayo mo-Iningles ni Lerias ug ang kamanggiuwawon ni Lim maoy hinungdan nga nisimang sa Maasin ang mga hinabang?