Sakit sa lawas ug kalag!

Laing text atong nadawat nga kono, mas mahadlok siya sa sakit sa kalag kay sa sakit sa lawas. Matud sa nagpadala, ang sakit sa lawas dali dang maayo, samtang ang sakit sa kalag lisud tambalan.

Tinuod kaayo. Apan, subo palandungon nga ang common practice natong mga mortals, mas gipangga nato ang atong lawas kay sa kalag. Samtang atong giampingan pag-ayo ang atong lawas, ato lang gipasagdan ang atong kalag.

Daku kaayo tag gasto pagpahimsog sa lawas, apan, kuli kaayo nga kita mogahin og panahon alang sa atong kalag, bisan og wa untay gasto. Ambut ngano nga mas mahal alang kanato ang lawas nga madugta bisan unsaog amping, kay sa kalag nga molungtad.

Nangutana ang atong texter ngano kono nga ang tawo nga magtinarong ug mosubay sa dalan nga matarong, mapuno man hinoon sa mga problema, samtang kadtong nagpuyo sa kasal-anan mora man hinoon og way problema?

Lisud pangutanaha. Apan, Brod, nakalimot ka ba sa giingon ni Jesus nga kon gusto kang mosunod Kaniya, carry your cross? Unya, niingon sad Siya nga the moment you decide to follow Him, expect trials and tribulations.

Busa, lisud ang pagtinarong ning kalibutana kay maputos ka sa mga kasakitan ug pag-antus. Ang dalan paingon sa Impiyerno sayon kaayo. Nindot kaayo. Ang kalipay nga isaad kanimo ni Satanas instant, samtang ang kalipay'ng langitnon nga gisaad ni Jesus, dugay pang mahitabo ug daghan kang masinati nga mga kasakitan.

Hunahunaa, Brod (Brod ka ba, o Sis?), ang mo-count dili ang karon, kondili ang ugma ug ang mga katapusang gutling sa imong kinabuhi. Sumaa, hain na man karon ang mga tawong dungganan kanhi, mga sapian kanhi, mga influential kanhi? Nangahanaw lang, lakip ang ilang mga kabtangan.Kay lagi lumalabay lang ang tanan.

Apan ang imong pagtinarong magpabilin. Pasagdi ug ayaw kasinahi silang nagpabadlong kay manubag da unya sila sa mga dautan nilang mga binuhatan. Unsa man ka bug-at sa mga suliran nga imo karong gipas-an, di kini ikatandi, sa walay katapusang kalipay nga naghuwat kanimo. Batoni ang hingpit nga pagsalig sa Ginoo. Di man tingali ka ma-dato, apan, ang kalinis sa imong kasing-kasing ug ang imong peace of mind maoy makahatag kanimog kalipay taliwaa sa kawad-on.Di ba, Dro? - Antolin dela Serna

Komentaryo? Text 0916-6484650