Kadaugan sa Pilipinas

Grabe gyud tuod ang kompetisyon tali sa ABS-CBN ug GMA-7. Ang kompetisyon wala lang ma-limit sa kung kinsang dunay mas makalingaw nga programa. Nagkontesay sad ang duha ka network sa lumba sa Mt. Everest.

Ang ABS-CBN ni-esponsor kang climber Leo Oracion, residente sa dakbayan sa Mandaue; samtang ang GMA-7 ni-esponsor kang climber Romeo Garduce.

Unang niabot sa Mt. Everest summit si Oracion kinsa gikatahong nitanom sa bandera sa Pilipinas sa kinatumyan sa bukid adtong miaging adlaw. Samtang si Garduce gikatakdang moabot sa tumoy karon pang adlawa.

Nakakuha sa gitawag sa media nga "pogi points" ang ABS-CBN kay naunhan man sa ilang "manok" ang "manok" sa karibal nga GMA network apan sa kinatibuk-an nga hulagway kadaugan ug kadungganan sa Pilipinas ang nahimo sa duha ka network-sponsored climbers. Pork barrel ipalit og security equipment Ni Fred Languido

Ang kakuwang sa pundo pagpalit sa gikinahanglang mga ekipos diha sa pantalan aron pag-ila sa bomba nga isagol sa mga kargamento maoy hinungdan nganong ang pantalan sa Sugbo sayon ra nga target sa terorismo.

Hangtud karon wa tay x-ray machine ug vapor analyzer aron pagdetect sa mga bomba nga posibling isud sa mga container vans. Ang maong kamatuoran angayang ikaalarma sa atong mga opisyal labi pa nga nagsing-abot ang ASEAN summit karong Disyembre.

Ang hulga sa terorismo dinhi sa Sugbo "real" ug namatud-an ni sa dihang duha ka mga membro sa Rajah Solaiman mitanum og bomba atubangan sa SM Cebu niadtong miaging semana. Napatay hinuon ang duha nga sila si Ali Usop ug Datu Niel Ulama ug nabantayan sa kapolisan ang bomba sa wa pang kabuto ug makahimo og kadaot.

Apan kinsay makapugong sa uban pa nilang mga kauban, labi pa sa giingong lider niini nga nagtubo pod dinhi sa Sugbo nga si Dino Amor Rosalejos Pareja paglusad og pagpangatake. Simbako og dili na unya mabantayan sa kapolisan ug molampus sila pagpaulbo niini unsa may mahitabo?

Segurado nga ang maong grupo mangita gyud og dapit nga sayon alang kanila ang paghimo niini ug ang atong pantalan usa sa maong mga dapit tungod sa kakuwang og mga kahimanan.

* * *

Aron pagsulbad sa maong problema, si kongresista Antonio Cuenco sa dakbayan sa Sugbo midawat sa hagit ning ubos ninyong alagad nga ang ilang mga pork barrel ihatag aron ipuno pagpalit sa maong mga ekipo tungod sa kamahal niini.

Bilib kong kongresista Cuenco sa maong baruganan tungod kay ang uban nga mga kongresista sa Sugbo mikisi kisi dayon niini. Si kongresista Raul del Mar miingon nga nakomitir na sa mga proyekto diha sa iyang distrito ang iyang pork barrel apan matud niya andam niyang ihatag ang iyang pork barrel alang sa sunod tuig.

Ang labing garapal nga kongresista sa Sugbo mao si Simeon Kintanar sa 2nd district. Matud ni Kintanar nga di gyud mahimong hilabtan ang iyang pork barrel kay gigahin na kuno ni alang sa mga water system projects sa iyang distrito ug uban pa nga mga proyekto sama sa kadalanan.

Okey lang unta og tinuod gyud nga gihapak sa mga proyekto ang iyang CDF, apan ang reklamo nga akong nadawat wa man gyuy klarong proyekto nga nahimo si Kintanar diha sa iyang distrito sukad siya milingkod.

Matud sa mihonghong nako nga ang nahimo ni Kintanar mao ra gyud ang pagpanghatag og kabir nga manok ug saging ngadto sa mga barangay. Kon tinuod ni, hain man diay paingon ang imong minilyon nga pork barrel congressman?

Ayaw ko'g ingna nga tag-usa ka milyon ang kantidad sa usa ka kabir nga manok ug saging nga imong gipanghatag sa mga barangay?

Hinaot lang pod nga tinud-on gyud ni Cuenco ang iyang pasalig ug dili lang pod pabilib ang iyang gipanulti.

* * *

Lisod tuohan ang pangangkon sa abogado ni SPO1 Marcial Ocampo nga gihasi ang ilang runner sa kampo sa prosecution pinaagi sa paghulga niini. Kini tungod kay wa masubay sa lohika nga ang prosecution manghulga sa mga saksi sa depensa. Ang normal nga mga hitabo mao nga ang prosecution gyud maoy hulgaon sa depensa.

Gawas pa wa motugma ang pangangkon ni Atty. Vicente Fernandez nga ang ilang runner gi pick-up sa mga armadong tawo nga iyang gitumbok nga mga sakop sa CIDG ug gihulga. Matud niya nga ang maong runner didto modangop sa barangay hall sa Cansojong, Talisay human kini matud pa buhii sa mga mipick-up kaniya.

Apan ang kapitan sa Cansojong nga si Aaron Capalla mitug-an sa DYLA kagahapon nga way midangop kanila nga biktima sa pagpanghulga ug di sab tinuod nga didto kini matulog sa ilang barangay hall. Di ko moingon nga namakak si Atty. Fernandez, apan matud sa kapitan dili tinuod ang iyang gipanulti.

* * *

[email protected]