EDITORYAL – Mga terorista ania na

Dunay timailhan nga nihinay-hinay nag suway sa pagtinonto ang mga terorista dinhi sa Sugbo diin nagatagamtam og kalinaw ang mga lumolupyo.

Duna nay pipila ka mga insidente diin nagpakita nga gisudlan nag mga terorista ang Sugbo ug bisan ang kapolisan mikonpirmar na niini.

Apan so far -- hangtud dinhi -- mipakita ang atong kapolisan og kaabtik kalabot sa ilang pagpakigbatok sa terorismo. Duha ka gidudahang terorista wala maka-ugpo dihang gika-engkwentro nila ang mga Sugbuanong polis.

Napakgang sad sa kapolisan ang tinguha sa mga terorista sa pagpamomba sa mga establisamento dinhi.

Manghinaut kita nga magpadayon ang kaabtik sa atong mga polis sa pagbantay ug pagpakgang sa mga teroristic acts niining mga tawong gustong samokon ang kalinaw nga naangkon sa mga Sugbuanon.