Kaugalingong kuryente

Ang hapit tibuok adlaw nga pagkaputol sa supply sa kuryente dinhi sa Sugbo niadtong Miyerkules tungod sa linog nga miigo didto sa Leyte, ang nag-unang tinubdan nato sa kuryente, hinaot nga nakapukaw sa atong mga opisyal nga ang Sugbo isip nag-unang probinsiya sa nasud gawas sa Manila nagkinahanglan gyud og kaugalingong tinubdan sa elektrisidad.

Dili mahimo nga hangtud sa hangtud magsalig ang Sugbo sa supply sa kuryente gikan sa geothermal power plant nga gipadagan sa National Power Corporation didto sa Tungonan, Leyte tungod kay sa higayon nga matay-og sa bisan unsang panghitabo ang maong lalawigan bisan og wa tay labot seguradong mapiang ang atong ekonomiya.

Suma unsay nahitabo niadtong Miyerkules, wa gyud gani'y bisan gamay nalang nga pagtay-og dinhi sa Sugbo, apan naapeke ang daghang negosyo ug mga transaksiyon sa gobyerno. Wa tuod ta maigo sa linog, apan sobra pas linog ang epekto nga atong natagamtaman.

Ambot og pila kaha ka milyon ang alkansi sa mga pabrika ug ubang mga bay patigayon niadtong Miyerkules mugna sa pagkahanaw sa kuryente? Segurado ko nga ang uban napugos nalang sa pagpanirado og sayo labi pa kadtong mga kompaniya nga ang trabaho kinahanglan gyud og kuryente.

Gawas sa mga negosyo, ang mga buhatan sa gobyerno naapektuhan pod, sama pananglit sa korte. Daghan sa mga kaso ang wa madayon ang husay tungod kay hilabihan ka ngitngit ug kainit sa mga korte.

Panahon na gyud nga hingusgan sa atong gobyerno labi pa sa atong mga opisyal sa Sugbo nga makaangkon ta og atong kaugalingon nga tinubdan sa kuryente. Di na kaayo tungason ang maong gimbuhaton tungod kay duna na tay daang planta diha sa Naga.

Gawas niini ang Korean Electric Power Company kon KEPCO mibubo og puhonan alang sa maong proyekto busa angayan ning suportahan inay nga babagan. Sa mga militanteng grupo nga mibabag sa maong proyekto panahon na pod nga hunongon na ang inyong protesta batok niini tungod kay sayod mo og unsa ka dako ang kahasol kon wa tay kaugalingong tinubdan sa kuryente. Di ba? Wa moy supply sa tubig, init ug ngitngit ang atong palibot.

Pangita nalang mo og laing paagi nga magamit isip pohunan pagpangayo og pundo gikan sa mga international funding organizations, ayaw i-angin ang kinabag-an sa mga molopyo sa inyong mini nga kawsa.

* * *

Di na angayang daginuton sa mga abogado ni SPO1 Marcial Ocampo ang mga kumentaryo sa mga sakop sa media batok sa mga lakang nga ilang gihimo pagdepensa sa ilang kleyente. Inay nga usikan ang ilang panahon pagpanggukod sa mga sakop sa media nga wa nila hiayoni ang mga kumentaryo mas makatabang nila kon maoy ilang atubangon ang pagpangitag mga testigos ug ebidensiya pagmatuod nga inosente ang ilang kleyente.

Ang pagtinguha ni Atty. Hector Fernandez nga ma-contempt si Lloyd Suarez tungod kay wa siyang kaayon sa kumentaryo niini nga gipasanginlan siyang dilatory tactic ang ilang pagpasaka og mga motion nga nagtinguha sa reinvestigation sa kaso ni Ocampo usik usik lang sa iyang panahon.

* * *

fplanguido@yahoo.com