Ang manok ni Sr. Pedro ug ang kotsara

Kaniadtong gabii sa Sabado gireklamo sa tulumanong Gerry Auxilio Saksi Evening Edition sa DYSS Super Radyo Cebu sa usa ka customer ang Sr. Pedro Lechon Manok nga anaa mahimutang haduol sa UP, Lahug kana human niya madiskobrehi nga wa nay pa'a ug pako ang litson manok nga iyang napalit sa maong tindahan. Matud pa sa reklamante nga si Jepoy nga makadaghan na kini niya masinati. Kaniadtong Sabado napuno na gyod kuno ang iyang pailob maong iya nang gireklamo ang Sr. Pedro Lechon Manok. Ang reklamo ni Jepoy gidasunan usab sa mga nakapaminaw. Ila usab nga gireklamo ang ubang sanga sa Sr. Pedro Lechon Manok dinhi sa Sugbo kay mao usab kini ang ilang nasinati.

Si Maue ug Ebay, tigtadtad sa litson manok sa Sr. Pedro nanghimakak sa pasangil nga tuyoon nila sa pagbilin ang paa ug pako sa litson manok nga ilang gitadtad aron ila kining ibaligya ug isud-an. Hinoon ilang giangkon nga aduna gayoy mga panahon nga sa ilang pagtadtad aduna gayoy paa ug pako sa litson manok nga mahabilin pero ila kining giipon sa nagsunod nga kustomer nga nagpatadtad usab sa litson manok nga napalit. Wa gyod kuno mahitabo nga ilang gitigum ang paa ug pako sa manok nga nahabilin sa ilang pagtadtad.

Pagkamabaw baya sa rason ni Maue ug Ebay sa pasangil nga gibato ngadto sa ilang tindahan nga gitrabahoan. Sa kadaghan sa mga nagreklamo nga walay paa ug pako ang litson manok nga ilang napalit sa Sr. Pedro Lechon Manok lisod toohan nga wa nila tuyoa ang pagbilin sa paa ug pako sa manok nga ilang gitadtad. Wa kahay dakong planggana nga gisawod ilawom sa tadtaran ni Maue ug Ebay aron abtik didto ang paa ug pako sa manok nga ilang gitadtad?

Sa kadaghan sa mga tigpaminawan sa tulumanon Gerry Auxilio Saksi Evening Edition sa DYSS Super Radyo Cebu gikan sa nagkalain-laing lugar dinhi sa Sugbo nga adunay Sr. Pedro Lechon Manok nga mipaabot usab sama sa kasinatian ni Jepoy ako nagduda nga basin nahimo na kining gimbuhaton sa mga tigtadtad sa litson manok nga baligya sa Sr. Pedro. Seguro wa masayod ang tag-iya sa Sr. Pedro Lechon Manok mao nga ato siyang gipahibalo ning atong lindog.

* * *

Didto sa Canada, gireklamo ni Maria Theresa Gallardo ang mga opisyal sa Roxboro, Montreal, Canada gumikan sa wa pagpatalinghog niini sa iyang reklamo sa magtutudlo sa Roxboro nga kanunay nga mangasaba ngadto sa iyang pito pa katuig nga batang nagtungha tungod sa paggamnit niini og kotsara panahon sa pagpangaon. Gani matud pa ni Gallardo nga gihinganlan pa ang iyang anak nga baboy sa magtutudlo tungod sa paggamit niini og kotsara sa iyang pagkaon. Reklamo pa ni Gallardo nga giingnan lamang siya sa principal nga iyang gisumbongan nga kinahanglan nga musunod sa kultura sa Canada kay anaa sila sa Canada. Didto ugod sa Canada, kotsilyo ug tinidor ang gamit nila sa pagpangaon.

Usa ka pagbugal-bugal sa atong kultura ang gihimo sa magtutudlo ug principal sa Roxboro, Montreal, Canada. Sayonan mo niana nga baboy daw kuno ang pito pa ka tuig nga batang Pinoy nga nagtungha sa ilang tunghaan kay migamit kini og kotsara sa iyang pagkaon. Boot ba nilang ipasabot nga kitang mga Pinoy baboy sa ilang panan-aw kay tinidor man ug kotsara ang atong gamit sa pagkaon? Nakaila kaha og baboy ning mga Canadian? Kuyawa ugod sa baboy didto sa Canada, magtinidor man ug magkotsara?