Immunity sa mangingisda

Kanus-a pa mahitabo nga ang mga mangingisda nakaangkon og "immunity" gikan sa mga kasong paghupot og mga explosibo?

Ang maong batakang pangutana maoy angayang tubagon ni piskal Evangeline Gicale sa dakbayan sa Lapulapu tungod kay iyang gibasura ang kasong paghupot og mga explosibo batok sa upat ka mga gidudahang dealers ug mga explosibo didto sa Caubian Island.

Ang bugtong rason ni Gicale nga miaprobar sa resolution ni assistant prosecution attorney Aida Castillo mao nga pulos mangingisda ang mga sinumbong busa wa kuno silay tuyo nga manghimo og bomba aron sa paghimo og kadaot.

Ang mabaw'ng rason nila pagbasura sa kaso tungod kay ang interest ra gyud kuno sa maong mga suspetsado mao ang pagpahigayon og illegal nga pagpangisda hinungdan nga inay ilakip pagpasaka ang kasong illegal possession of explosives, illegal fishing lang ang ilang gikiha didto sa korte.

Sa ilang resolution nga gipakanaog nga nagbasura sa kaso batok nila ni Virgilio Amorin Sr. ug sa anak niini nga si Virgilio Jr., Richard Otarra ug Roberto Lumapas wa gyud gani makahatag og legal nga basihanan si Gicale aron isuporta sa ilang hukom.

Tiaw mo, kon ang usa ka mangingisda masakpang maghupot og mga bomba ug kagamitan paghimo niini dili mahimong makiha tungod kay sila mga mangingisda. Unsa man intawo'y sala sa mga molopyo sa Lapulapu nga sa kadaghang mas kalipikado nga mohupot sa maong pwesto, si Gicale pa man gyud ang natudlo niini?

Ang tinubdan sa Lintunganay mitug-an nga usa sa mga sinumbong gikatahong dunay pag-umangkon nga empleyado sa Lapu-Lapu city prosecutor's office. Di hinuon makiangayon kon ato siyang iduhig sa hinanggaw nga pagbasura sa kaso, apan di sab kalikayan ang pagduda nga basin giluto ang maong kaso.

* * *

Karong adlawa, sa maka-usa pa saulogon sa tanang mamumuo ang Labor Day uban ang dakong pagtu-aw ug pangutana kon angayan ba kaha nato kining isaulog?

Alang nako, bisan taliwala sa kalisod sa atong kahimtang ang matag mamumuo nga nagpabiling dunay trabaho hangtud karon, angayan gihapong magsaulog tungod kay taliwa sa krisis ug sa pagpanaktak og mga kawani sa daghang mga kompaniya nagpabilin pa gihapon ka nga dunay trabaho.

Kini maoy labing importante niining higayona ug dili ang pagpasuwabi sa pagpangayo og dili makiangayon nga usbaw sa suholan bisan og dili makaya sa atong kompaniya. Dili ko hipokrito nga dili gusto og usbaw sa sweldo, apan kon ang pagpamugos og pagpangayo og usbaw maoy hinungdan nga mapugos ang kompaniya sa pagpanaktak o di ba kaha pagpanirado, mas maayo nga way usbaw apan magpabilin kang dunay trabaho.

Di sab siguro makiangayon alang niadtong mga mataktak sa trabaho tungod kay mapugos ang kompaniya paghimo niini aron ikatapal sa gipangayong usbaw sa ubang mga kawani? Sa ako nang giingon way wa magkinahanglan ug usbaw sa suholan karong panahona, apan mas labaw nga gikinahanglan sa kadaghanan sa mga kompaniya sa pagkakaron ang pagsabot sa ilang mga kawani.

Mao nga bisan og di ta kapaabot og usbaw, magsaulog lang gihapon ta. Hinaot sab nga ang paagi sa atong pagsaulog di mosampot sa dugoon ug gubot nga mga protesta diha sa kadalanan. Maayong adlaw sa pamumoo natong tanan!!!

* * *

E-mail: [email protected]