Korte mo pag-abot

Ang mga opisyal sa usa ka residents association diha sa barangay Labangon nagplano nga pasakaan nila og kaso si city engineer Antonio Sanchez kay wala kini makapatuman sa tukmang lagda nga gilatid sa National Building Code ngadto sa ilang silingan nga nagtukod og balay.

Si Monica Marmol, presidente sa Bliss Homeowners Association Incorporated miingon nga kon si Engr. Sanchez wala gayo'y buhaton nga aksyon sa ilang reklamo batok ni Celestino Catacutan, dayonon gayod nila ang pagpasaka og reklamo sa city engineer.

Ang pasangil ni Marmol mao nga si Catacutan, nga maoy postmaster nga nagbase diha sa City Hall, miusab sa desinyo sa iyang balay nga wala molukat og permit gikan sa Office of the Building Official.

Apan ang baruganan usab ni Catacutan mao nga duna na siya'y pagtugot kaniadto ni kanhi Mayor Alvin Garcia, kay ang yuta nga gitarokan sa panimalay iya man sa dakbayan.

Naapil sa isyu si Engr. Sanchez tungod kay matud ni Marmol wala gayod makapatuman ang city engineer sa tukmang lagda sa balaod ngadto ni Catacutan.

Apan tan-aw nako niining maong isyu, dili gayod masulbad kon dili idangop sa hukmanan.

Ang ginagmay nga panagsungi angay ra man unta nga sulbaron diha sa Katarungang Pambarangay, apan kon ang mga hingtungdan dili moabag, sigurado nga dili gayod masulbad.

Apan sa akong bahin, dili g'yod ko gusto nga ang managsilingan - sama nila ni Catacutan ug Marmol nga nagtupad ra ang panimalay - magkasungi sa ilang maayong pagtinagdanay.

Mao man gani nga sa milabay'ng tulo ka tuig, midawat ko og katungdanan sa among barangay sa Lorega-San Miguel isip sakop sa Lupong Tagapamayapa.

* * *

Naghisgot man ta og Lupong Tagapamayapa, akong sublion pagpahibalo nga sugod ugma, Mayo 1, dili na ako sakop sa Lupon sa barangay Lorega-San Miguel.

Ang rason sa akong pagbiya mao nga tinguha nako nga ibutyag ang mga anomaliya sa among barangay, nga gilambigitan og mga opisyal ug kawani.

Salikwaot kaayo nga ako nga usa ka Lupon magpadayon sa katungdanan unya magsigi og saway sa ilang binuhatan.

Walay rason nga mopilit ko pagka sakop sa Lupon sa among barangay unya sawayon nako ang pagdumala sa among mga opisyal kabahin sa kampanya sa graft and corruption.

Isip senior reporter sa The Freeman nga gidistino sa Palace of Justice ug nakahuman og "course" sa Philippine Center for Investigative Journalism, dili ko malipat-lipat sa "baliko" nga argumento ni bisan kinsa.

Ang akong mga argumento gipasubay sa balaod. Kon unsa ang gilatid sa balaod maoy atong sundon. Sa paghimo niini, anhi nato maila kon unsa nga matang ang atong mga namunoan sa kagamhanan.

* * *

Lisud karon ang pagpangita og trabaho, apan ang uban kon makatrabaho na, sayon-sayon ra nga maghimo og binuang.

Malooy man gani ko nianang uban diha nga magbuwad tawon sa init samtang maghangad sa mga gipapilit nga "notices" sa mga "job hirings."

Alang sa mga nag-edad og 18 ngadto sa 30-anyos ug makamao moayo og mga cellphones - kadtong nakahuman g'yod og kurso sa pagpangayo og cellphone apan wala pa makatrabaho - diay inyong kahigayonan nga makatrabaho.

Andama ang inyong certificate of attendance sa cellphone repair course, bio-data, police clearance, ug mas labing maayo kon ang inyong pinuy-anan anaa sa southern part sa Sugbo.

Kontaka dayon ang telepono 272-0048 ug cellphone 0918-6697780.