ANG MIINGON PAMALANDONG...Pagduda

Adunay nindot nga linugdangan nga kita moduda sa mga butang. Ang tumong niini mao nga malikayan ang posibilidad nga mailad. Hinuon, kon maglabi na lang sab ang pagduda, wala pud kini'y maayong linugdangan. Kay dili sa tanang higayon, maayo ang ma dudahon.

Ingon ini usab ang nahitabo sa apostol nga si Tomas. Natural lamang tingali sa usa ka tawong sama kaniya ang magduha-duha sa taho nga ang ilang Magtutudlo, nabanhaw. Ang maong kinaiya sa pagkamadudahon ni Tomas, maoy nakababag sa pagdawat sa mga testimoniya sa iyang mga kaubanan kalabot sa mahinungdanong balita. Buot ni Tomas nga makaseguro pinaagi sa paghikap sa mga agi sa lansang nga milagbas sa mga kamot ug tiil ni Jesus ingon man ang inagian sa dughang sa bangkaw sa iyang kilid. Ug sa dihang nakita ni Tomas ang maong ebidensiya nga iyang buot masuta siya nakatuwaw: "Ginoo ko ug Dios ko!"

Matag usa kanato adunay susamang kinaiya nga nahuptan ni Tomas. Kini tungod kay adunay mga higayon nga kita dili hugot diha sa atong pagtuo ngadto sa atong Ginoo. Daghan kaayo kitang mga kuskos balungos. Buot kita og mga pruyba labina sa mga higayon nga masinati ang mga kalibog ingon man ang mga kalisdanan. Hibaw-i nga dili gayud mahitabo nga matubag nato ang mga nagkadaiyang mga tanghaga sa kinabuhi. Tinuod ang pagtuo nagkinahanglan pud og rason aron kini mas malig-on pa. Usa kini ka matang sa pagkinabuhi. Ug kay kalabot man sa kinabuhi, angayan lamang nga ato kining puy-an ingon sa angay gayud diha sa tim-os ug hamtong nga pagtahan sa kaugalingon ngadto sa Diosnong Probidensiya.