Septiyembre ang bukas sa klase

Kun walay remedyo nga makit-an si Collector Ma. Lourdes Mangaoang ilawom sa balaod, mahinayon ang paglingkod ni Collector Grace Caringal isip bag-ong kolektor Bureau of Customs - Port of Cebu sugod karong adlawa.

Tungod sa Customs Personnel Order (CPO) No. 169 nga giisyu ni Customs Commissioner Napoleon Morales, si Caringal nay bag-ong kolektor sa adwana sa Sugbo, samtang si Atty. Mangaoang adto sa Port of Ilo-Ilo.

Niadtong miaging semana, adunay CPO nga gipirmahan si Morales nga nagdestino ni Caringal sa Freeport of Subic, samtang si Mangaoang pabilin sa Cebu.

Gihimong rason ang pagbalhin ni Mangaoang sa Ilo-Ilo ang pagkuha og suporta niini gikan sa kontrobersiyal nga Commission on Election Commissioner Virgilio Garcillano ug ni Kongresista Prospero Pichay.

Apan naglibog ko nganong gi-link pa si Mangaoang ngadtong Garcillano nga ang suporta nakuha ni Mangaoang kaniadtong wala pa mahitabo ang kontrobersiyal nga Hello Garci tape. Sala ba diay ni Mangaoang kun suportahan siya ni Garcillano sa dihang wala pa ilambigit ang naulahi sa giingong pagpanikas sa administrasyong Arroyo sa milabay'ng 2004 nga presidential election?

Gi-rason usab sa pagrelibo kang Mangaoang ang pagtikyaob sa koleksiyon sa duties and taxes. Pero, sa paniid sa mga tawong dugay nang nag-cover sa adwana nagkanayon nga bisan kinsa pang kolektor ang ibutang sa Sugbo, lisud makuha ang collection target nga gidestino sa Sugbo tungod sa kataas niini daw 'unrealistic.'

* * *

TRO. Nagplano ang kampo ni Mangaoang nga mo-aplay og temporary restraining order (TRO) aron dili mahinayon ang paglingkod ni Caringal sa Sugbo.

Ang CPO No. 169 man gud, nakalapas sa bag-ong giisyu ni Pres. Gloria Macapagal-Arroyo nga Executive Order No. 133.

Sa EO 133, tanang "movements" kun lahugay sa Bureau of Customs nagkinahanglan og clearance o permiso gikan sa secretary sa Department of Finance (DOF).

Apan ang CPO NO. 169 nga gipirmahan ni Morales walay pirma ni Finance Secretary Margarito Teves.

Kun walay pirma, siyempre masabtan nato nga wala kini clearance ni Teves.

Hinuon, sa korte na lang nato ibilin ang pagdesider sa legalidad sa CPO No. 169 ni Morales.

Kun i-upheld niini ang legalidad niini, makalingkod gyud si Caringal sa Sugbo. Kun makalingkod na siya sa Sugbo, iyang misyon ang pagpamatuod kanato nga kaya niyang makuha ang collection target sa Sugbo.

* * *

BUKAS-KLASE. Gibalik na usab ang debate karon ang pagbalhin sa abli sa klase gikan sa naandan nga bulan sa Hunyo ngadto sa Septiyembre.

Si Bokal Victor Maambong nangamahan og resolusyon nga nag-awhag sa Department of Education sa pagkuha sa pulso sa publiko kun uyon ba kini nga ibalhin ang pagbukas sa klase.

Nagsugod kining maong laraw human gisugyot nilang Senador Juan Flavier ug Senate President Franklin Drilon.

Gihimo nilang rason ang kabati sa panahon sa Hunyo. Ini'g entrada gud sa Hunyo anha dihang mga panahona mogara ang langit pagpabunok sa ulan.

Luoy intawon kaayo ang mga tinun-an tungod kay mangabasa ang uniporme ug kagamitan sa eskuwelahan. Kadaghanan gani ma-pulmonya ilabi na kun dili mabantayan sa mga ginikanan ang ilang pagkabasa sa ulan.

Sa gawas sa nasud, dili usab Hunyo ang pagbukas sa ilang klase. Adunay magsugod og Agosto, adunay Septiyembre.

Apan sukad-sukad gud, naanad naman kita nga sa Hunyo na gyud ang pagbukas sa klase.

Tingale makahatag og "inconvenience" sa kadaghanan kun adto pa sa Septiyembre ang pagbukas sa klase.

Pananglit ipatuman kini karong tuiga, ang mga tinun-an maghulat pa og tulo ka bulan una makabalik og tungha.

Dakong "adjustment" sa mga tinun-an, ginikanan, ug mismong mga kadagkuan ug mga magtutudlo ang gikinahanglan kun ibalhin sa Septiyembre gikan sa Hunyo ang pagbukas sa klase.

Ang mga kompaniya nga nagsagop niining benepisyo nga "school bonus" or "educational bonus" anha man ang releasing sa Hunyo aron itayming sa enrolment iyawat makasapal sa gikinahanglan sa mga tinun-an nianang bulana.

Pero, posible kini. Sa ako nang giingong, "adjustment" lang ang gikinahanglan.