EDITORYAL – Laing kadungganan

Lain na sang Sugbuanon ang mihatag og laing kalibutanong kadungganan sa Sugbo -- ning higayona sa natad sa astronomiya.

Si Christopher Go, lumad nga taga dakbayan sa Sugbo, gibalita sa National Aeronautics and Space Administration (NASA) sa Estado Unidos nga nakadiskobre og Red Spot sa Planetang Jupiter.

Mihugyaw ang mga banggiitang astronomer ug uban pang mga sayentista sa NASA tungod niining discovery kun napalgan ni Christopher kinsa usa lang ka amateur astronomer.

Ang kalampusan sa atong igsuong Sugbuanon giisip nga usa ka dakong kalambuan tungod kay makatabang kini sa pagpalapad sa kahibalo sa mga space scientist kabahin sa kawanangan ilabi na sa planetang Jupiter.

Angay kitang moduyog sa mga taga NASA sa ilang paghugyaw kalabot sa kalampusan ni Christopher Go, atong igsuong Sugbuanon.