Pagtulon-an

Duna ko'y isugyot sa atong mga polis ug sa pipila ka huwes agi og pagpahinumdom kanila aron mahimong epektibo sila sa tagsa-tagsa nila ka katungdanan ug dili sila masilotan.

Tinuod ngilngig na og nahibaw-an ang kadaghanan sa atong kapolisan kabahin sa pagpahigayon og mga police operations, ingon man ang kadaghanan sa mga huwes ngilngig usab sa mga balaod.

Kining ako, pagpahinumdom lang niadtong mga polis ug huwes nga nakalimot sa ilang tukma nga gimbuhaton.

Nakakuha ko og kopya sa resolusyon sa Supreme Court sa kaso ni retired judge Mamerto Coliflores sa Municipal Trial Court in Cities diin gipamulta siya og P20,000.

Gihukman sa Supreme Court nga sad-an si judge Coliflores sa kasong ignorance of the law nga gipasaka batok kaniya sa usa ka Bernardo Betoy Sr.

Kay miretiro na man si judge Coliflores, ang P20,000 nga multa adto na kuhaon sa iyang retirement benefits nga tingali wala pa ihatag tungod sa na-pending niya nga kaso. Ingon niini ang sugilanon.

* * *

Kaniadtong Septembre 17, 1999, si judge Coliflores nga mao pa ang executive judge kaniadto sa MTCC, miisyu og search warrant ngadto sa mga sakop sa Cebu City police intelligence section.

Kini nagtugot sa mga polis nga sila si Inspector Cesar Arquillano, SPO2 Rex Cabrera ug SPO1 Jesus Roxas nga rondahon ang balay ni Betoy kay kuno dunay mga tawo nga nasigpatan nila nga mag-anhaan unya daghang mga armas.

Wala ibutang sa Supreme Court resolution kon asa dapit dinhi sa Sugbo ang balay ni Betoy. Tuod man, gironda sa mga polis apan ang nakuha nila usa ra ka shotgun ug usa ka air gun. Pulos kini lisensyado.

Nauwaw tingali nga wala man sila'y mga illegal nga armas nga nakuha, ang maong mga polis wala mobalik sa korte aron i-report ang gisangpotan sa ilang pagronda sa balay ni Betoy.

* * *

Si judge Coliflores wala makatuman sa lagda nga sukit-sukiton g'yod niya ang mga polis nga miaplay kaniya og SW kon duna ba g'yod sila'y "personal knowledge" nga naghupot og illegal nga butang ang subject sa SW.

Igo man lang miingon ang mga polis nga "Yes your honor, nakita g'yod namo nga dunay mga armas ang subject person ug dunay armado nga mga tawo nga mag-anhaan sa balay ni Betoy."

Ang tukma unta sa kapolisan mao nga ang ilang pangangkon, suportahan nila og certification gikan sa firearms and explosives section nga magmatuod nga si Betoy dili "licensed firearm holder."

Tan-awa dili ba ang nakuha gikan sa balay ni Betoy, mga lisensyado nga shotgun ug air rifle.

Unya si judge Coliflores napakyas usab pagsuta kon ang mga polis nga giisyohan niya og SW, mituman ba nga moreport sila sulod sa 10 ka adlaw sa kalamboan sa ilang pag-serve sa warrant.

Kon wala kini buhata sa mga polis, iyang ipatawag og kon magdumili, iyang i-cite og contempt of court. Sa ato pa, ipapriso niya ang mga polis nga dili motuman sa lagda.

Mas labing maayo nga ang mga huwes kinahanglan gayod nga magtinil og lista kinsa ang ilang giisyohan og SW ug sutaon kon natuman ba ang gilatid sa Rules of Criminal Procedures nga moreport sila sa kalampusan sa ilang operation.

Nindot unta kon makatabang ako pagpahinumdom niadtong mga nakalimot na sa ilang katungdanan.

* * *

Ipadala ang inyong mga komentaryo, mensahe alang kanako sa 0917-3836645.