EDITORYAL – Ipakita ang kaisog

Mipakita na sa iyang kaisog si Presidente Gloria Arroyo ug ang iyang administrasyon. Maisogong mibarog atubangan niadtong mga tawo nga buot mopukan kaniya.

Human niya iproklamar ang State of National Emergency, gipapanakop ni Mrs. Arroyo kadtong mga tawo nga sa dugay'ng panahon milatigo kaniya sa tinguha nga matagak siya sa iyang gilingkuran sa Malacañang.

Manghinaot kita nga dili molubad kining kaisog nga gipakita sa Presidente.

Manghinaot usab kita nga kahatagan niyag leksyon kadtong mga nagsamok-samok sa iyang administrasyon diin miresulta sa pagkadaut sa ekonomiya nga iyang gitinguhang mosaka ug mosaka.

Panahon na nga kadtong way laing tinguha kundili ang pagsamok-samok sa kadalanan aron magkaguliyang ang nasud ug mongil-ad ang imahe niini sa gawas, pailhon nga duna say kinutuban ang ilang pagsamok sa nasud.