Likay sa kagubot

Tabangan nato nga dili magdugay ang state of national emergency nga gideklarar ni Presidente Gloria Macapacal-Arroyo pinaagi sa pagpabiling kalmado.

Dili nato samutan ang tensiyon pinaagi sa pag-apil-apil sa mga kagubot sa kadalanan nunot sa pagsupak sa kagamhanan. Mao kini ang makapasamot sa kainit sa sitwasyon.

Nagtuo kami nga ang pagka-kalmado maoy bugtong tambal aron mabugnaw ang kagamhanan ug ikonsiderar ang paglibkas sa deklarasyon pinaagi sa Proclamation No. 1017.

Ang maayong buhaton karon mao ang pag-ampo, pag-apong sa tagsatagsa nato ka trabaho, apan pabiling igmat sa mga panghitabo sa atong palibot.

Walay sakop sa oposisyon o administrasyon nga gustong may dugong mobanaw tungod lamang sa panag-ilog sa gahum.

Busa, kitang mga sibilyan dili angayang makisawsaw sa kagubot sa nasud.