Kita ang mo-explain nganong wa ta malakip sa top 20 competitive cities

Daghan ang natingala ngano nga ang Queen City of the South, waa makasulod sa top twenty competitive cities sa nasud. Usa kos nahibong, tungod kay bilib man gyud kos Cebu.

Hinoon, alang nako, di nato kasuk-an ang nag-survey tungod kay igo man lang silang nag-collate sa mga tubag sa ilang mga pangutana. Di gani nato mabasul ang mga respondents tungod kay igo man lang pod silang nitubag sa mga pangutana.

Unsaon ta man, di nato sila kabut-an kon unsay ilang impression sa harang dakbayan sa kasadpan. Lagmit mao kini ang ilang nakita sa Cebu City:

Hugaw, abug, ug kon mag-uwan, lapok, ug daling magbaha'. Unya, dunay mga dapit nga baho, basura nagkatag, mga kanal ug mga estero hilabihang hugawa. Ang mga skywalk bisag waa kaayoy mogamit, hugaw sad kaayo.

Environment gipasagdan. Daghang electric posts waay suga, kadalanan libaongon, ang gipangtapak nga aspalto, inig-uwan mangatang-tang lang pod dayon. Ug mosamot kag untol-untol tungod kay ila mang gipaburot.

Imong makita nga waay klarong urban planning, kayamokat lang agi. Mga sidewalk nga nagsaka-kanaug, puno sa mga vendor nga maoy nakahugaw sa maong mga dapit, maglisud kag agi.

Kadalanan gihimong bodega sa mga softdrinks, garahe, diskohan, ug vulcanizing shop.

Tan-awa ang Carbon ug Taboan, mao lang gyud gihapon since time immemorial. Ang Pasil, ang Bo. Luz ug ubang mga squatter areas, nisamot ka-samok, waa gyuy uminto. You call that development?

Mao kini ang Queen city of the south. Unya, atong pa-eksplikahon ang AIM nganong waa ta ma-sulod sa top twenty competitive cities? Ikaw, Dro, ang angayan mo-explain.