Usa usab sa hinungdan sa pagkawala sa akong kolum mao ang akong pagbakasyon sa Tambulig, Zamboanga del Sur, ang lugar nga akong natawhan. Dugaydugay usab ako didto alang sa pagpahulay tungod kay pipila na usab ka tuig nga wala ako makauli didto.
Karon mibalik na usab ako sa sirkulasyon ug ato na usab nga himbisan ang mga nagbagang isyu nga kasamtangang mihulma sa atong kasaysayan.
Human sa maong hitabo, isig punting sa tudlo kadtong may kalabotan sa maong pasundayag. Daghan ang nag-ingon nga huyang kaayo ang seguridad nga gipatuman sa tagdumala sa arena gumikan kay wala kini makasugakod sa bagang bul-og sa katawhan nga gusto mosalmot sa maong kalihokan.
Ang uban mibasol usab sa maong television network nga tungod sa kaikag niini nga motaas ang rating sa "Wowowee," nataligam-an kuno niini ang paghatag og maayong seguridad sa katawhan. Nagkulang g'yud kuno ang siguridad sa arena alang sa linibo nga buot manimpalad nga makadaug og premyo sa maong game show.
Wala usab makalikay ang kagamhanan gikan sa mga pagbasol. Dunay pipila ang nag-ingon nga kon dili pa tungod sa kapobrehon sa katawhang Pilipino, dili mahitabo ang mangilngig nga trahedya.
Dako g'yud kuno og pagkulang ang gobiyerno sa tinguha niini nga mahaw-as ang minilyong katawhan gikan sa tumang kalisod. May punto usab baya sila.
Matud sa usa ka survey, mokabat sa 40 porsiyento sa mga Pilipino ang mokita lamang og P100 matag adlaw. Tungod lagi sa kuyanap nga kapobrehon dinhi sa nasud, gibanabana nga halos katunga sa populasyon ang dili halos makakaon og katulo sa usa ka adlaw tungod sa ka gamay sa ilang inadlaw'ng kita.
Insakto lamang baya nga dili nato kapugngan nga basolon kadtong tagdumala sa arena, ang television network ug ang kagamhanan tungod sa maong trahedya. Kini tungod kay dili kadto mahitabo kon maayo pa ang pagkontrolar sa katawhan didto sa Philsports Arena.
Apan tungod sa maong grabe nga hitabo, morag nakalimot na kita nga tipik na sa atong kultura ang pagpanimpalad pagkab-ot og dinaliang suwerte. Siguro dili na layo kanato ang nangandoy og dakong salapi pinaagi sa pagtaya sa lotto, masiao ug uban pa.
Dili ba dinhi lamang siguro sa Pilipinas makita kadtong nangandoy nga makasungkit og minilyon gikan sa lotto, masiao ug uban pa pinaagi sa pagtaya sa kumbinasyon sa numero sa adlawng natawhan sa mga anak, asawa, igsuon ug uban pa sa pamasin nga modaug?
Gani dili lamang kadtong mga pobre ang kanunay nga motaya sa lotto, masiao ug uban pa kondili hasta usab kadtong mga adunahan. Duna koy kailang mga sapian nga regular nga motaya og lotto sa pamasin nga modaug usab.
Sa nakalabay'ng trahedya, dili ko motuo nga walay arang-arang og kahimtang ang wala miadto sa Philsport Arena aron pag-apil sa maong game show. Sa akong nakita, dili lamang kadtong mga pobre ang miadto sa arena sa pamasin sa makakuha og premyo.
Usa lamang ang akong pangagpas ngano nga nahitabo kadto. Ug kini dili ang kapobrehon sa katawhan kondili ang kapakyas sa mga tagtungod pagkontrolar sa bagang bul-og sa katawhan