Likay sa trahedya

Tungod sa trahedya sa ULTRA, mas higpitan nang paghatag og pagtugot sa dagkong konsiyerto ug ubang live shows. Ang Cebu City Council magpanday og ordinansa nga momando sa mga tigpasiugda og kalihokan nga punsisokan sa daghang tawo pakiglambigit sa kapolisan ug local government units aron pagtino sa kaluwas sa tanang mangapil. Matod ni Bise Mayor Michael Rama angayng mangunay nang gobyerno pagsusi ug pagtabang sa pangandam sa seguridad aron kalikayan ang pagkasubli sa samang katalagman.

Mosugyot sab si Rama nga kolektahan nang mga tigpasiugda og salapi nga magsilbing garantiya aron kabayran dayon ang mga biktima kon duna man gyoy kaguliyang nga moulbo ug kadaot sa kinabuhi ug kabtangan nga mamugna atol sa kalihokan. Angay hinuong susihon sab ni Rama may igo bang katakos, kawani ug panahon ang LGUs pagtuman ning bag-ong gimbuhaton nga iyang nahunahunaan. O di ba hinuon moungot lang ang lehitimong kalihokan sa pribadong sektor ubos sa bag-ong sistema.

* * *

Ginamit ang iyang lapad nga kasinatian pagduma sa tinuig nga Sinulog mardi gras, job fairs ug ubang dagkong kalihokan sa Sugbo, niang mga sugyot ni Rama nga gipanghinaot nga makatabang di lang sa mga tigpasiugda kon dili apil na sa mga mangapil paglikay sa kaguliyang sa kalihokan:

• Taas, makuti ug tininuod nga pagplano nga maglakip sa tanang posibleng mga panghitabo, sama sa kaguliyang, pinusilay, o atake sa mga terorista;

• Pagpuno sa puwersa sa kapolisan sa pribadong mga guwardiya, mga barangay tanod ug ubang mga boluntaryo nga gipaubos sa hingpit nga pagbansay-bansay sa tanang aspeto sa crowd control;

• Pagbahinbahin sa luna sa kalihokan ngadto sa nagkalainlaing hut-ong pinaagi sa lapad nga mga agianan aron nga mabuwag inay matingob ang tensiyon ug kon duna gyoy kaguliyang makalusot dayong mga ambulansiya pagtabang sa mga biktima; ug

• Kanunayng pagpahibawo sa mga mangapil pinaagi sa media ug mga trumpa sa luna sa kalihokan sa mahinungdanong mga tugon, labi na sa dagkong kausaban sa kalihokan, aron nga mokatay ang sayop nga mga huhungihong nga makasugnib sa kagubot.

* * *

Haskang dakoa na sa gasto sa ABS-CBN pag-atiman sa tanang panginahanglan sa mga biktima. Gawas sa pag-atiman sa mga tagtungod sa 74 ka minatay, laing 400 nga naangol ang gigastohan sa ilang pagpahiling sa mga ospital. Wa pay labot sa kaliboan nga gihakot gikan sa ULTRA, gipasaka og buses sa mga terminal ug sa mga barko sa pantalan. Nunot ni sa pag-angkon nang ABS-CBN Chairman Gabby Lopez og responsibilidad sa katalagman.

Gatosan sab ka mga kawani sa ABS-CBN ug ubang mga kompaniya nga gipanag-iya sa mga Lopez ang nisuroy sa kabalayan sa mga biktima sa Metro Manila ug kasilinganang mga lugar aron pagpagaan sa ilang pagbangotan pinaagi sa stress debriefing ug counseling.