Imbistigaha g'yod

Nagkadaku ang isyu kabahin sa pasangil nga si Bogo Mayor Celestino Martinez Jr. nalambigit og mga binuang, apil na ang pagtulis sa bangko nga nahimutang sa iyang lungsod.

Human mitahan si Joel Sumabong ngadto sa kapolisan, mitug-an kini nga dihang siya nahimo pa nga "bata-bata" sa mga Martinez sa ika-upat nga distrito, daghan sila og gipangpatay.

Wala pa hinoon ibutyag sa kapolisan kon unsa ang unod sa extra-judicial confession nga boluntaryong gi-execute ni Sumabong.

Bisan tuod og si mayor Martinez ug ang iyang amahan nga si Junnie Martinez Jr. nanghimakak sa maong mga pamasangil, apan dili kini angay nga ibaliwala.

Kon dunay ibutyag si Sumabong nga may mga tawo sila nga gipatay, kamong mga police investigators angay nga mohimo dayon og pakisusi niini.

Sutaa kon tinuod ba nga ang mga tawo nga ilang gibutyag gipatay ba g'yod tinuod ug kon mitukma ba ang iyang pamahayag sa mga panghitabo dihang ang mga giingong biktima gipatay.

Sayon ra kaayo kini pamatud-an kon wala ba si Sumabong mamakak. Ang laing maayong sutaon kon nganong gipatay man nila ang maong mga tawo?

Kon dunay lig-ong ebidensya, angay g'yod nga ang mga hingtungdan pasakaan gayod og kaso bisan og kinsa pa sila.

Unya tukma ang awhag ni Sumabong nga ang paghusay sa kaso kinahanglang dili adto himoon sa hukmanan sa Bogo.

Kinahanglan nga dunay pagtugot nga anhi ipahigayon ang husay sa kaso sa hukmanan sa dakbayan.

Unya, si Sumabong anhi tanggonga sa bilanggoan sa dakbayan kay peligro ang iyang kinabuhi kon tua siya didto sa amihanang kalungsuran.

Wala kini magpasabot nga kriminal ang mga Martinez, apan dili nimo kalikayan nga dunay ilang mga supporters nga loyal kaayo og maoy manimalos.

* * *

Laing isyu nga maayong palawman ang imbistigasyon mao ang giingong kalabotan sa pipila ka "labaw" sa Bagong Buhay Rehabilitation Center sa pagdawat og "tax" gikan sa mga tawo nga magdala og mga butang sulod sa prisohan.

Aw kon ang duha ka gwardya nga nagranggo pa og Jail Officer-1 dili motug-an, sila ang mag-om-om sa silot. Ngilngiga god aning mga tawhana.

Tiaw mo, mangayo kuno sila og buhis nga tag P250 gikan sa mga tawo nga naninda og bisan unsa sa sulod panahon nga mopasulod kini og baligya agi diha sa gate.

Aron masabtan sa uban, ang ubang priso diha sa BBRC gitugotan man god nga makapamaligya og pagkaon didto sa sulod sa selda.

Aw ang mga abtik sab nga gwardya, nag-inantigo sab dayon kay mangayo sab sila'g buhis. Karon "sakspan" lagi. Hala, ibutyag ninyo kon kinsa ang nagpaluyo.

Kon dili ninyo ibutyag, aw sigurado nga kamong duha ang masakoti. Kon dili kamo makabutang og pyansa, kamo'y prisohon diha sa BBRC. Angay lang sab uy.

* * *

Nakabisita ko kagahapon sa Public Attorney's Office og nahimamat nako si regional public attorney Hermelo Butron. Akong nasayran ang problema sa maong buhatan.

Kon dili madali, mahurot ang mga abogado sa maong buhatan kay nag-iya-iya man lang og resign. Natural, gihimo lang nga training ground sa mga bag-ong abogado ang PAO.

Ang rason niini, mao nga dili kaayo makapakumbinsir ang ilang sweldo nga ang usa ka abogado magpabilin sa maong serbisyo.

Sayonan ka nga mga P20,000 ra ang sweldo sa usa ka labing ubos og ranggo nga abogado sa PAO. Acceptance fee ra na sa mga abogado nga mag-private practice.