EDITORYAL – Leksiyon nga angay'ng tun-an

Sa nahibaw-an na sa kadaghanan kanato nga mga 66 ka tawo ang namatay atol sa stampede nga nahitabo didto sa Ultra sa dakbayan sa Pasig.

Ang mga namatay ug ubang mga nangaangol gumikan sa stampede, gusto unta mosud sa Ultra diin ipahigayon unta ang noontime TV show sa ABS-CBN nga "Wowowee" kinsa nagsaulog sa ilang anibersaryo.

Ang stampede kun lamok-lamok nahitabo diin miresulta sa dakong trahedya gumikan sa --sumala sa inisyal nga imbestigasyon -- kakulang sa ilang gitawag nga preparasyon ug mga lakang nga buhaton enkaso mahitabo ang lamok-lamok.

Gihisgutan ang kinahanglan untang gihimo sa isponsor sa maong show ug sa kapolisan mismo, apan awahi na kini. Kay suma pa sa panulti-on, "Manguros ra ta kun human na ang kilat."

Leksiyon kini nga kinahanglan tun-an sa atong dakbayan -- City Hall, mga isponsor sa dagkong show, ug mismo sa katawhan.

Among pahasubo sa mga pamilya sa mga biktima sa trahedya.