Direyot mapriso

Pagka alegre g'yod sa korte kagahapon dihang gimando na ni Regional Trial Court (RTC) judge Ireneo Lee Gako Jr. nga ipapriso ang tulo ka abogado sa nagpa-sex transplant nga si Wesy Quisumbing.

Gisakitan si Judge Gako tungod kay gipasanginlan man siya sa mga abogado ni Wesy nga abogado kanhi sa ilang pamilya ug maoy rason nga nagduda siya nga mopabor kini sa iyang amahan.

Buot man god sa mga abogado ni Wesy nga si Judge Gako dili na mopadayon sa paghupot sa maong kaso, apan migamit sila og mga termino nga morag sakit-sakit g'yod.

Nindot ang ilang mga argumento nga gipresentar apan kinahanglan nga suportahan nila og kamatuoran. Kon moingon sila nga si Judge Gako abogado kaniadto sa Transfarm ug ubang korporasyon sa mga Quisumbing, ilang pamatud-an.

Maayo na lang gani kay gipasaylo pa sila ni Judge Gako og wala na lang ipahinayon pagpapriso.

* * *

Angay nga ibutyag sa kadagkoan sa kapolisan kon pila na ka polis ang napahamtangan og silot tungod sa wala pagtunga sa ilang court duties.

Nangangkon man god ang mga opisyal sa kapolisan nga daghan na sila og mga napahamtangan og silot tungod sa kapakyas nila pagtunga sa hukmanan aron motistigos sa mga kaso nga ilang gipasaka batok sa mga suspetsado.

Kitang katawhan angay nga masayod kon kinsa kining maong mga polis ug kon unsay silot nga napahamtang kanila. Mas maayo usab nga sutaon kon kapila na nila gibuhat ang maong kasaypanan.

Kon dunay higayon nga may mga lig-ong saksi sa kaso apan wala ipatawag sa korte atol sa mga husay, ug sa maong rason naabswelto na hinoon ang dinakpan, lahi na usab kana.

Kinahanglan nga ibutyag gihapon nato kon kinsa ang maong mga saksi, unsay ila unta nga pamahayag, ug kon kinsa ang fiskal nga nadistino sa hingtungdang korte.

Apan mahimo man nga ang kadagkoan sa polis kon nagtuman lang sila sa ilang tahas, mo-coordinate sa fiskal aron nga mapatawag ang ilang sakop ug makaatubang sa korte.

Kana kon gilantaw sa kapolisan nga ang pamahayag sa maong polis - sama pananglit sa mga nakakita sa shabu atol sa raid, makahatag og kadaut o kaha makapalugak sa ilang ebidensya.

Sa ingon nga paagi, kon magdumili gihapon ang fiskal, anha sila diha moreklamo kay masabot na man nga wala kini maninguha nga mapalig-on ang iyang ebidensya.

Sa mga husay sa lainlaing kaso diha sa hukmanan, maminaw ko sa pamahayag sa mga polis. Dunay mga polis nga maayo manubag, ilabi na kadtong nagtipig g'yod og "notes" kabahin sa ilang operation nga misangpot pagkasikop sa dinakpan.

Apan kadtong mga polis nga wala g'yod tawon magtipig og mga "notes," matagbaw tawon og hangad-hangad sa kisami unya pun-an pa nga maglisud pagsulti og ininglis, samot.

Nalimot tingali sila sa gisulti sa banggiitang magsusulat nga si Chino Roces nga kon duna kay mubo kaayo nga lapis mas maayo na lang kini kay sa hataas kaayo nga pagtimaan diha sa huna-huna.

Tinuod, kay tungod sa kadaghan nato og gimbuhaton, malimtan g'yod nato ang mga detalyi apan mahinumdoman ra kini kon makabasa kita sa bisan mugbo kaayo nga mga "notes."

Unya, tungod sa mga notes nga imong gisuwat, tabla ra nga gipatik na usab kini nimo diha sa imong alimpatakan ang mga detalyi og malisud na kining mahikalimtan.

He! He! Bitaw malimtan ra kini sa pagpangligid na sa panahon, sa mga adlaw nga mahimong semana, sa semana nga mahimong buwan ug sa mga buwan nga mahimong katuigan.