Pagdagmal sa anak

Hangtod sa atong panahon karon, adunay mga ginikanan nga modagmal sa ilang anak o mga anak bisan sa gamay lamang nga sayop. Wala mohatag og bili o mahadlok sa balaod sa child abuse.

Usa lamang ang ilang katarongan. Disiplina ang ilang tuyo ngadto sa anak. Ug ang balaod sa child abuse dili makatabang sa pagdisiplina sa anak kay mag-abusar hinuon ang anak niini. Dili na mahadlok sa mga ginikanan.

Ibutang nato nga husto ang mga katarongan niining maong matang sa ginikanan. Apan ang balaod sa child abuse maoy pagpanalipod sa kabataan nga biktima sa sobrang pagkastigo sa bata nga dili matawag nga usa na ka pagdisiplina. Gani, adunay mga ginikanan nga hapit na lang patyon ang bata sa pagdagmal o paglatos o sa pagbun-og.

Pila ra goy panit sa usa ka bata, pila ra goy bukog niya. Humok pa kaayog panit ang bata ingon man huyang pa usab kaayo ang iyang kabukogan.

Ania kanato ang paghatag og hustong disiplina sa atong anak, kay kita man ang mga ginikanan ug kita ang labaw nga nasayod kun kinsa sa atong anak ang buotan ingon man kun kinsa sa atong anak nga angay disiplinahon tungod sa iyang pagka abusado o kaha sa iyang pagka badlongon.

Ang balaod sa child abuse gikinahanglan usab kaayo bisan kitang mga ginikanan ang angayan nga modisiplina sa atong anak, tungod lagi kay adunay mga ginikanan nga sobra ra usab kaayo nga mokastigo sa ilang anak.

Gani, aduna may mga anak, nga bisan linghod pa kaayo ang kaisipan apan naglaag-laag na sa kadalanan, tungod kay milayas aron paglikay sa sobrang pagkastigo sa iyang mga ginikanan kaniya bisan gamay lamang ang sayop o sala nga iyang nahimo.

Dili nato kini ikalalis, nga ang ubang mga streetchildren biktima sa sobrang pagdagmal sa iyang mga ginikanan, nga kun wala pa niya kini matagamtami, dili unta siya maglaag-laag sa kadalanan, anaa unta siya sa ilang panimalay, giatiman sa pagkaon ug panglawas sa iyang mga ginikanan. Ug mahatagan unta og edukasyon.

Busa,kitang mga ginikanan angay lamang gayod nga magtamod sa balaod sa child abuse kay alang kini sa ilang kaayohan gikan sa mga kamot sa mga ginikanan nga sobra kaayong moabuso kanila.