Agimat

Ang Dios Miingon...
Pamalandong matag Domingo
Enero 29, 2006; Ikaupat nga Domingo sulod sa tuig-National Bible Sunday
Mga Pagbasa: Dt. 18:15-20/1 Cor. 7:32-35/Mk. 1: 21-28

Sa gamay pa kong bata hilig kaayo kong motan-aw og Sine sa Dos matag hapon nga tanan matag Bakasyon. Paborito nakong artista mao man si Ramon Revilla nga niadtong panahona, nabantog sa iyang mga agimat ug gahum-gahum. Gikan sa Bala ngadto na sa mga maligno mapildi gyud tawon sa atong hero. Anananggal, kapre ug tikbalang kaniya gyud mangurog. Wa pay labut sa mga kalag nga maigo og malukapa gyud sa iyang suntok. Kon ato lang itingob ang atong pamalandong, makaingon kita: "Dili gyud magmadaugon ang si bisan kinsa nga dautan batok sa maayo." Hibaw-i nga agimat ra gani to, unsa pa kaha ang gahum sa Ginoo sa?

Ang gahum ni Jesus gikan sa Dios nga maoy nakapahimo kaniyang mokontrolar ug mosumpo sa mga pwersa ug espiritong dautan. Mao nga dihang sila gipahilom niya, ang tanan nga nakasaksi niabot gayud og katingala. Bisan pa man kon ang uban sa mga tawo kaniya gihapon nagduda. Apan ang matuod mao: "Si Jesus mipapahawa ug mipakita sa gahum nga Diosnon ug dili ang gahum nga yutan-on." Gahum nga maoy nimantala sa Paghari sa Dios dinhi sa Yuta.

Adunay mga higayon sa atong kinabuhi nga daw sa mogawas nga nagmadaugon ang mga puwersang yawan-on dinhi sa kalibutan. Ang malupigon og ang mga bangis tang mga kaigsuonan usahay motamay kanila nga nagbinuotan diha sa panginabuhian kay nag-antus man gihapon sa kapit-os. Dili sama kanila nga nahimong mga instant millionaire tungod sa kinitaang pinaspasan. Ang Kultura sa Kabangis ug ang padayong pagduwa sa gahum kanila nga naa sa pangatungdanan, padayong mihamok kanato. Ang nagkutay nga balansayon sa kahiwian ug korupsiyon maoy nakapatuok kanatong mga Pilipinhon. Mahimong mahitabo kini diha mismo sa atong nataran nga wala lang nato hibaloi o dili ba hinuon, ato lang gibalewala. Apan nagpasabot ba kini og kapildihan sa maayo?

Bible Sunday karon ug ang Pulong sa Dios gamhanan kaayo. Mao nga haom nga atong himuong tinubdan sa kusog ug kalig-on ang Bibliya. Kon si Ramon Revilla nakapukan sa mga dautang pwersa diha sa pelikula, kita usab gidapit nga mopukan sa atong mga dautang binuhatan og kinaiya diha mismo sa atong tagsa-tagsa ka mga kinabuhi pinaagi sa paghimo sa Kristohanong Pagtulon-an ingon nga dugokan sa tanan tang panlimbasog. Kay bisan og kapila ka pa moingon og: Hoy Pinoy Ako, may Agimat ang Dugo ko! Apan wala nato ilha ug suora ang Ginoo diha sa atong kinabuhi, ang tanan walay kapuslanan. Kay diha lamang kaniya mabatonan nato ang kalig-on ug ang gahum nga makigbatok sa mga dautang kailibgon ug hunahuna.