Sa gamay pa si Willie, nadakpan ang iyang amahan samtang kini nagmaneho sa iyang sakyanan. Sakay siya niadto. Nakita niya ang iyang Amahan nga misipit og usa ka gatos ka pesos sa iyang lisensiya. Nakalarga sila diha-diha. Ang iyang Amahan miingon kang Willie, "Walay kaso to dong kay daghan man pud ang nagbuhat ana ba." Bakasyon kadto sa dihang gikuyog siya sa iyang mama nga mangompra. Nakadawat og sobrang sukli ang iyang mama nga misulod niini sa iyang bulsa dungan ang pag-ingon: "Walay kaso ni Dong, dili lang ako ang nagbuhat niini. Nakatrabaho si Willie sa usa ka mamaligyaay og mga prutas. Ang iyang trabaho mao ang pagtago sa mga hapit na malata ilawom sa mga maayo pag dagway nga mga prutas. Ang iyang amo miingon: "Mao ni'y maayo sa negosyo dong!" Nidako si Willie ug nakabaton siya og maanindot nga trabaho. Wala madugay, nasakpan siyang nanguha sa mga produkto sa kompaniya ug diha-diha gipapahawa. Kasaba ang gisugat kaniya sa iyang mga ginikanan nga nagdungan og yawyaw: "Pagkamakauulaw sa imong gibuhat! Ang labaw nga dili gyud namo madawat mao kanang pagpanikas!"
Pamalandong Ang dakong kalayo sa kriminalidad, magagikan gayud sa ginagmay'ng haling sa pagpakasala. Ang mga ginikanan dako kaayo'g kaakuhan nga mamahimong mga panig-ingnan sa ilang mga anak. Mao nga aron mas epektibo ang pag-umol kinahanglan gyud unta nga mopakita ang usa ka ginikanan og maayong binuhatan.