Estrikto apan maayo

Ang estrikto nga pagpatuman sa mga lagda diha sa mga tunghaan, magbunga gayod og kaayohan.

Kini maoy wala kaayo masabti sa ubang ginikanan nga modayon lang og kasuko kon ang tagdumala sa mga tunghaan diin anaa ang ilang kabataan magtungha, mopatuman og mga lagda.

Panahon tingali karon nga lakbitan nato ang kabahin sa edukasyon, ilabi na nga hapit na magsugod ang mga entrance test diha sa mga tunghaan para sa sunod tuig.

Ang Cebu City National Science High School nga anaa mahimutang sa dalan Salvador, Labangon naila kaayo nga ngilngig og mga produkto kay dili kini magpalupig.

Gani, ang ilang mga tinun-an maoy miguwa nga mananaog sa bag-ohay pa lang nga Metro Student Quiz-High School category.

Estrikto g'yod hinoon sila kay kon madugay ka'g abot sa tunghaan, sigurado nga ma-disiplina ka pinaagi sa pagpasilhig sa grounds. Apan uyon ko niini kay paagi kini sa pagdisiplina.

Gipahibalo ni Dr. Alpia Duyongco, assistant administrator sa Cebu City National Science High School nga nanawat na sila og mga tinun-an nga gustong mosalmot sa entrance test karong Pebrero 18.

Apan mao lagi, kinahanglang taas g'yod ang imong grado aron ka madawat diha sa maong tunghaan.

* * *

Ang Zapatera Elementary School, gidumala usab sa principal nga gihulagway sa uban nga "estrikto" kaayong mopatuman sa mga lagda.

Apan sa akong tan-aw, tukma ang gihimo ni principal Luz Jandayan kay tan-awa, daghan kaayo ang kalampusan nga naangkon sa Zapatera Elementary School gikan sa iyang pagdumala.

Kagahapon pa g'yod kami nga nagka-estorya si Ma'am Jandayan og nasabot nako nga ang iyang tumong mao ra g'yod ang pagpalambo sa mga tunghaan nga iyang madumala.

Ang Barangay Luz Elementary School nga iyang gidumala kaniadto numero uno usab. Ambot lang karon kon nagpabilin pa ba nga dili na siya ang nagdumala.

Dunay mga ginikanan nga masuko sa pagdili ni Jandayan nga magpabilin sulod sa school compound ang mga Papa, Mama ug mga Yaya sa kabataan atol sa klase.

Alang kanako, wala g'yoy sayop si Jandayan. Kaniadto, makakita ko og mga ginikanan nga mag-standby sa tunghaan nga maghingut-anay lang diha sa hagdanan.

Ang uban magsaba-saba kay magsigi og katawa samtang sila nagkomedyahay. Sa laktud, makatugaw pa sila sa klase. Sa kaestrikto ni Jandayan, daghang kalampusan nga naangkon ang Zapatera Elementary School.

Tiaw mo, sa tanang mga public schools sa dakbayan, ang Zapatera Elementary School lang maoy nahimong finalist sa bag-ohay lang nga Metro Student Quiz-elementary category.

Usa ka tinun-an sa Zapatera Elementary School nahimo usab nga fourth placer sa bag-ohay pa lang nga Regional Press Conference-copy editing category nga didto gihimo sa Toledo nga giapilan sa mga tinun-an gikan sa lainlaing tunghaan sa Central Visayas.

Unya, nakadaug usab ang mga tinun-an sa Zapatera Elementary School sa Sinulog. Dayon ang nakapalipay g'yod ni mayor Tomas Osmeña kay duha sa iyang mga tinun-an, nagpakita og kabuotan.

Giuli nila ang cellphone ni Tangub City mayor Jennifer Tan nga nawala atol sa Sinulog mardigras kaniadtong Enero 15 ug nakit-an sa duha ka bata.

Tungod sa kalipay sa mayor, gipahibalo sa mayor si Jandayan nga gahinan sa dakbayan og P1.3 milyones ang Zapatera Elementary School aron gastohon sa pagpa-renovate sa karaang building.