Maayong pamatasan

Tudloan ni Philippine National Police chief Director Arturo Lomibao og maayong pamatasan ang mga polis.

Suma pa sa Philippine Star News Service, si Lomibao milusad og "transformation program" diin ang mga police desk officer bansayon sa maayong pamatasan labot sa ilang pagdawat og pag-abi-abi sa publiko.

Tudloan sila sa pagsugat og "Good morning" o ba kaha "Maayong buntag" sa mobisita sa ilang opisina o motawag sa telepono.

Maayo kining nahunahunaan ni Director Lomibao. Makapanindot sa imahe o hulagway sa kapolisan. Kay ang tinuod naay pipila ka mga polis nga dili kamao mohatag og pangatahuran sa publiko.

Dili hinuon kini bag-o pa nga courtesy program sa kapolisan. Kahinumduman nga sa panahon ni Cebu City Police Chief Abundio Gultiano iya usab gitudloan ang iyang mga sakop sa pagpakitag maayong pamatasan ngadto sa publiko. "Good morning, Ma'am" o "good morning, Sir" iyang gimando nga himoon sa iyang mga desk officer ug telephone receptionist.

Natuman kini ug daghan ang midayeg sa kanhi Cebu Police Department.